प्रतिनिधी – सोलापूर
राज्यात दुष्काळाचे सावट असताना नाशिक कुंभमेळ्यावर अनावश्यक खर्च करण्याऐवजी उपलब्ध निधीचा उपयोग शेतकरी आणि दुष्काळग्रस्त भागांसाठी करावा, अशी ठाम भूमिका वंचित बहुजन आघाडीचे युवा नेते सुजात दादा आंबेडकर यांनी मांडली.
शुक्रवार, दि. ९ ऑक्टोबर २०२६ रोजी सकाळी ११ वाजता आयोजित पत्रकार परिषदेत सुजात दादा आंबेडकर आणि वंचित बहुजन आघाडीचे प्रदेशाध्यक्ष राजेंद्र पातोडे यांनी पत्रकारांशी संवाद साधला. यावेळी विविध विषयांवर चर्चा करण्यात आली. दरम्यान, राज्यातील दुष्काळी परिस्थिती आणि नाशिक कुंभमेळ्याच्या नियोजनाबाबत पत्रकारांनी प्रश्न उपस्थित केला असता आंबेडकर यांनी आपली भूमिका स्पष्ट केली.
नाशिक कुंभमेळा प्राथमिक स्वरूपात आणि मर्यादित खर्चात आयोजित केला पाहिजे. कुंभमेळ्यासाठी मोठ्या प्रमाणावर अनावश्यक खर्च करण्याऐवजी तो निधी शेतकऱ्यांच्या मदतीसाठी, दुष्काळग्रस्त भागांतील नागरिकांच्या समस्या सोडवण्यासाठी आणि आवश्यक उपाययोजनांसाठी वळवला पाहिजे, असे त्यांनी सांगितले.
राज्यातील शेतकरी विविध संकटांचा सामना करत असताना शासनाने त्यांच्या प्रश्नांना प्राधान्य देणे गरजेचे आहे. धार्मिक मेळाव्यांवर खर्च करण्यापेक्षा संकटात सापडलेल्या शेतकऱ्यांना आर्थिक आधार देणे आणि दुष्काळग्रस्त भागांना दिलासा देणे महत्त्वाचे असल्याचेही आंबेडकर यांनी नमूद केले.
यावेळी त्यांनी धार्मिक मेळाव्यांना साधू-संत, बुवा-बाबा आणि भाविकांची मोठी उपस्थिती असली, तरी केवळ देवाच्या भरवशावर संकटे दूर होणार नाहीत, अशी परखड टिप्पणी केली. संकटांचा सामना करण्यासाठी प्रत्यक्ष उपाययोजना, योग्य नियोजन आणि जनतेच्या हितासाठी निधीचा प्रभावी वापर आवश्यक असल्याचा संदेश त्यांनी दिला.नाशिक कुंभमेळ्याच्या खर्चावरून सुजात आंबेडकर यांनी मांडलेली ही भूमिका आगामी काळात राजकीय आणि सामाजिक वर्तुळात चर्चेचा विषय ठरण्याची शक्यता आहे.
जनता संघर्ष न्यूज, सोलापूर
बातम्या व जाहिरातीसाठी संपर्क –9579838240
