प्रतिनिधी – अक्कलकोट,
लाखो भाविकांचे आणि सर्वधर्मीयांचे श्रद्धास्थान असलेल्या ख्वाजा पीर सैफुलमुलक चिस्ती दर्गा हैद्रा देवस्थान येथे सुमारे १८ ते २० लाख रुपये खर्चाचा सौरऊर्जा प्रकल्प आता लोकसहभागातून उभारण्यात येणार आहे. याबाबत देवस्थान ट्रस्टने निर्णय घेतला असून, लवकरच प्रकल्पाचे काम पूर्ण करून त्याचे लोकार्पण करण्यात येणार असल्याची माहिती ट्रस्टचे अध्यक्ष रफिक मुजावर यांनी पत्रकारांशी बोलताना दिली.
यापूर्वी श्री स्वामी समर्थ अन्नछत्र मंडळातर्फे २० किलोवॅट क्षमतेचा सौरऊर्जा प्रकल्प देणगी स्वरूपात देण्याचा निर्णय घेण्यात आला होता. यासंदर्भात सुमारे दीड ते दोन महिन्यांपूर्वी हैद्रा देवस्थान ट्रस्टने मंडळाचे संस्थापक अध्यक्ष जनमेजयराजे विजयसिंहराजे भोसले आणि कार्यकारी अध्यक्ष अमोलराजे भोसले यांच्याकडे पत्राद्वारे मागणी केली होती. मात्र, अद्याप देवस्थान ट्रस्टला कोणतीही रोख रक्कम किंवा धनादेश प्राप्त झालेला नसल्याने या प्रकल्पाचा संपूर्ण खर्च सामाजिक बांधिलकीतून आणि लोकसहभागातून उचलण्याचा निर्णय घेण्यात आल्याचे मुजावर यांनी स्पष्ट केले.
वीजबिलाच्या खर्चात होणार मोठी बचत
हैद्रा देवस्थानला सध्या दरमहा सुमारे ६० ते ७० हजार रुपयांचे वीजबिल येते. त्यामुळे देवस्थानच्या व्यवस्थापनावर मोठा आर्थिक भार पडत आहे. सौरऊर्जा प्रकल्प कार्यान्वित झाल्यानंतर वीजखर्चात मोठी बचत होण्याची अपेक्षा आहे. बचत होणारा निधी धार्मिक, सामाजिक आणि सेवाभावी उपक्रमांसाठी वापरणे शक्य होणार आहे. त्यामुळे या प्रकल्पासाठी भाविक, नागरिक आणि सामाजिक बांधिलकी जपणाऱ्या दानशूर व्यक्तींनी पुढाकार घ्यावा, असे आवाहन ट्रस्टच्या वतीने करण्यात आले आहे.
सर्वधर्मीयांचे श्रद्धास्थान
हैद्रा देवस्थानला अक्कलकोट तालुक्यात विशेष धार्मिक महत्त्व आहे. तालुक्यातील विविध निवडणुकांच्या शुभारंभासाठी नारळ फोडण्याची परंपरा या देवस्थानातून सुरू होत असल्याचे सांगितले जाते. जागृत देवस्थान म्हणून प्रसिद्ध असलेल्या या ठिकाणी भाविक मोठ्या संख्येने दर्शनासाठी येतात आणि नवसपूर्तीसाठीही गर्दी करतात. विविध धर्मांच्या भाविकांना जोडणारे श्रद्धास्थान म्हणूनही या देवस्थानाची ओळख आहे.
आता लोकसहभागातून सौरऊर्जा प्रकल्प उभारण्याच्या निर्णयामुळे देवस्थानच्या वीजखर्चात बचत होण्याबरोबरच सामाजिक सहभागातून विकासकामांना चालना मिळणार आहे.
यावेळी ट्रस्टचे उपाध्यक्ष बंदेनवाज मुजावर, सचिव वकील मुजावर आणि नागनहळळी आश्रमशाळेचे सचिव जावेद पटेल आदी उपस्थित होते.
जनता संघर्ष न्यूज,सोलापूर
बातम्या व जाहिरातीसाठी संपर्क – 9579838240
