प्रतिनिधी -सोलापूर
पत्रकार किरण बनसोडे लिखित आणि जागृती पब्लिकेशन, सोलापूर यांच्या वतीने प्रकाशित करण्यात आलेल्या ‘मीडिया मास्टर’ या पत्रकारितेची गुरुकिल्ली ठरणाऱ्या पुस्तकाचे प्रकाशन सोलापूर महानगरपालिकेचे महापौर विनायक कोंड्याल यांच्या हस्ते आज उत्साहात संपन्न झाले.
डॉ. निर्मलकुमार फडकुले सभागृह येथे आयोजित प्रकाशन सोहळ्यास पुण्यश्लोक अहिल्यादेवी होळकर सोलापूर विद्यापीठाचे सहायक कुलसचिव प्रा. डॉ. शिवाजीराव शिंदे, मनपा प्राथमिक शिक्षण मंडळाचे प्रशासन अधिकारी मल्हारी माने, चळवळीतील ज्येष्ठ विचारवंत दत्ता गायकवाड, बहुजन शिक्षक-शिक्षकेतर कर्मचारी महासंघाचे प्रदेशाध्यक्ष अण्णासाहेब भालशंकर, संपादक दिलीप पेठे, संपादक प्रशांत माने, श्रमिक पत्रकार संघ सोलापूरचे अध्यक्ष विक्रम खेलबुडे, डॉ. बाबासाहेब आंबेडकर ट्रस्टचे संस्थापक अध्यक्ष डॉ. सुरेश कोरे आणि उपसंपादक विजय गायकवाड यांच्यासह पत्रकारिता, सामाजिक, शैक्षणिक तसेच विविध क्षेत्रांतील मान्यवर उपस्थित होते.
यावेळी महापौर विनायक कोंड्याल यांनी ‘मीडिया मास्टर’ पुस्तकाचे प्रकाशन करून लेखक पत्रकार किरण बनसोडे यांचे अभिनंदन केले. बदलत्या काळानुसार पत्रकारितेचे स्वरूपही मोठ्या प्रमाणात बदलत असून डिजिटल माध्यमे आणि सोशल मीडियाचा प्रभाव सातत्याने वाढत आहे. अशा परिस्थितीत पत्रकारितेची विश्वासार्हता, सामाजिक बांधिलकी आणि पत्रकारितेची मूलभूत मूल्ये जपणे अत्यंत आवश्यक असल्याचे महापौरांनी सांगितले.
पत्रकारिता क्षेत्रात नव्याने येणाऱ्या युवक-युवतींसह पत्रकारितेचा अभ्यास करणाऱ्या विद्यार्थ्यांसाठी ‘मीडिया मास्टर’ हे पुस्तक निश्चितच उपयुक्त आणि मार्गदर्शक ठरेल, असा विश्वासही महापौर कोंड्याल यांनी व्यक्त केला.
या पुस्तकामध्ये पत्रकारितेतील विविध कौशल्ये, बातमी लेखन, वृत्तांकन, माध्यमांची कार्यपद्धती तसेच बदलत्या डिजिटल युगातील पत्रकारितेचे स्वरूप याबाबत मार्गदर्शन करण्यात आले आहे. पत्रकारितेच्या क्षेत्रातील अनुभव आणि ज्ञान नव्या पिढीपर्यंत पोहोचावे, या उद्देशाने हे पुस्तक तयार करण्यात आले आहे.
यावेळी उपस्थित मान्यवरांनी लेखक पत्रकार किरण बनसोडे यांचे अभिनंदन करून पुस्तकाच्या पुढील वाटचालीस शुभेच्छा दिल्या. कार्यक्रमास पत्रकारिता क्षेत्रातील विद्यार्थी, पत्रकार, विविध संस्थांचे पदाधिकारी तसेच नागरिकांची मोठ्या संख्येने उपस्थिती होती.
जनता संघर्ष न्यूज,सोलापूर
संपादक-सिद्धार्थ भडकुंबे
बातम्या व जाहिरातीसाठी संपर्क-9579838240
