
प्रतिनिधी – सोलापूर
दिवाळीचा सण केवळ दिव्यांच्या रोषणाईपुरता मर्यादित न ठेवता सामाजिक बांधिलकी जपत इतरांच्या जीवनात आनंदाचा प्रकाश पसरवण्याच्या उद्देशाने सारथी युथ फाऊंडेशनच्या वतीने सोलापुरात अनोख्या दिवाळी उपक्रमाचे आयोजन करण्यात आले. ‘व्यसनापासून दूर राहूया, आनंदाचा दिवा लावूया’ आणि ‘इतरांच्या आयुष्यात आनंदाचा प्रकाश पसरवून दिवाळी साजरी करूया’ या संदेशातून तरुणाईमध्ये व्यसनमुक्तीबाबत जनजागृती करण्यात आली.

या उपक्रमाला भवानी पेठ येथील ‘वेव्ह्ज डान्स अकॅडमी’चे संचालक तथा प्रसिद्ध नृत्यदिग्दर्शक राकेश मनोहर सोनी यांची प्रमुख उपस्थिती होती. त्यांनी अतिथी नृत्यप्रशिक्षक म्हणून युवकांना मोफत नृत्यप्रशिक्षण दिले. तसेच झुंबा सत्राच्या माध्यमातून शारीरिक तंदुरुस्तीचे महत्त्व पटवून देत निरोगी आणि व्यसनमुक्त जीवनशैलीचा संदेश दिला.

कार्यक्रमात विविध मनोरंजनात्मक खेळांचे आयोजन करण्यात आले होते. उपस्थितांना दिव्यांचे वाटप करून दिवाळीचा आनंद द्विगुणित करण्यात आला. व्यसनमुक्तीचा संदेश देणारी आकर्षक रांगोळी आणि फुलांची सजावट हे उपक्रमाचे विशेष आकर्षण ठरले. याशिवाय सजावटीसोबत सेल्फी काढून सोशल मीडियावर फोटो शेअर करण्याची स्पर्धाही घेण्यात आली. यामुळे व्यसनमुक्तीचा सकारात्मक संदेश डिजिटल माध्यमातून अधिकाधिक नागरिकांपर्यंत पोहोचविण्याचा प्रयत्न करण्यात आला.

हा उपक्रम यशस्वी करण्यासाठी श्वेता पाटील, स्नेहा चौगुले, भाग्यश्री शिगरकंटी, लक्ष्मी शिगरकंटी, श्रावणी मुदगल, श्रेया मुदगल, समर्थ कोळी, समृद्धी वाघमारे, श्रीकन्या गोसावी, वेदांत चाबुकस्वार, रोहन चाबुकस्वार, वैष्णवी चाबुकस्वार, कार्तिक चाबुकस्वार, अरमान शेख, नागेश्वर स्वामी, शक्ती स्वामी, दिव्यानी चौगुले आणि सोनाक्षी पवार या स्वयंसेवकांनी विशेष परिश्रम घेतले.
नृत्य, कला, आरोग्य आणि सामाजिक जनजागृती यांचा सुंदर संगम घडवून आणत सारथी युथ फाऊंडेशनने दिवाळी साजरी करण्याचा वेगळा आदर्श निर्माण केला. मनोरंजनासोबतच व्यसनमुक्तीचा संदेश देणाऱ्या या उपक्रमाचे सोलापूर शहरातून कौतुक होत आहे.
जनता संघर्ष न्यूज,सोलापूर
संपादक – सिद्धार्थ भडकुंबे
बातम्या व जाहिरातीसाठी संपर्क – 9579838240
















