प्रतिनिधी- सोलापूर,
सोलापूर जिल्ह्यातील सर्व प्राथमिक शाळांच्या इमारती, सुरक्षा व्यवस्था आणि शैक्षणिक सुविधांची सद्यस्थिती तपासण्यासाठी तातडीने स्वतंत्र तांत्रिक ऑडिट करण्यात यावे, अशी मागणी रिपब्लिकन पार्टी ऑफ इंडिया रोजगार आघाडी (एकतावादी)चे प्रदेशाध्यक्ष विकीबाबा चौधरी यांनी केली आहे.
जिल्ह्यातील प्राथमिक शाळांच्या इमारतींची मजबुती, वर्गखोल्या, छत, भिंती, फरशी, विद्युत व्यवस्था, पिण्याचे पाणी, स्वच्छतागृहे तसेच विद्यार्थ्यांच्या सुरक्षिततेशी संबंधित सर्व बाबींची प्रत्यक्ष पाहणी करून त्याचा सविस्तर अहवाल तयार करण्यात यावा, अशी मागणी त्यांनी केली आहे.
तसेच शाळांमधील स्वच्छता आणि देखभाल व्यवस्थेची स्वतंत्र तपासणी करणे आवश्यक आहे. विद्यार्थ्यांना सुरक्षित, स्वच्छ आणि आरोग्यदायी वातावरण उपलब्ध करून देणे ही प्रशासनाची जबाबदारी असल्याचे चौधरी यांनी नमूद केले.
विशेषतः जुन्या किंवा धोकादायक स्थितीत असलेल्या शाळांच्या इमारतींची तातडीने पाहणी करून आवश्यक दुरुस्ती, मजबुतीकरण अथवा पुनर्बांधणीबाबत योग्य ती कार्यवाही करण्यात यावी. विद्यार्थ्यांची सुरक्षा हा अत्यंत गंभीर विषय असून, कोणतीही दुर्घटना घडण्यापूर्वी प्रशासनाने प्रतिबंधात्मक उपाययोजना करणे गरजेचे असल्याचे त्यांनी सांगितले.
त्यामुळे सोलापूर जिल्ह्यातील सर्व प्राथमिक शाळांचे इमारत ऑडिट, सुरक्षा ऑडिट तसेच शैक्षणिक व मूलभूत सुविधांची स्वतंत्र तपासणी करून त्याचा अहवाल सार्वजनिक करण्यात यावा. तपासणीत आढळणाऱ्या त्रुटींची तातडीने पूर्तता करून विद्यार्थ्यांची सुरक्षितता सुनिश्चित करावी, अशी मागणी विकीबाबा चौधरी यांनी प्रशासनाकडे केली आहे.
