ग्रामपंचायत अधिकाऱ्यांच्या सुरक्षेसाठी सोलापूरात मूक मोर्चाशि;वरे घटनेतील दोषींवर कठोर कारवाईसह विविध मागण्यांसाठी मुख्यमंत्री यांना निवेदन.

प्रतिनिधी -सोलापूर 

ग्रामपंचायत अधिकाऱ्यांच्या सुरक्षिततेचा प्रश्न ऐरणीवर आणत महाराष्ट्र राज्य ग्रामपंचायत अधिकारी युनियन, जिल्हा शाखा सोलापूरच्या वतीने मंगळवारी (दि. १ सप्टेंबर) जिल्हा परिषद कार्यालय ते जिल्हाधिकारी कार्यालय असा भव्य मूक मोर्चा काढण्यात आला. ग्रामपंचायत अधिकाऱ्यांना सुरक्षित वातावरण मिळावे तसेच विविध प्रलंबित न्याय्य मागण्यांवर शासनाने तातडीने सकारात्मक निर्णय घ्यावा, अशी मागणी यावेळी करण्यात आली.

जळगाव जिल्ह्यातील पारोळा तालुक्यातील शिवरे येथे १७ ऑगस्ट रोजी ग्रामसभा सुरू असताना कर्तव्य बजावत असलेल्या ग्रामपंचायत अधिकारी स्व. श्री. पी. एन. पाटील यांच्यावर झालेल्या हल्ल्यानंतर त्यांचा हृदयविकाराच्या तीव्र झटक्याने मृत्यू झाला. या घटनेमुळे राज्यातील ग्रामपंचायत अधिकाऱ्यांमध्ये भीती व असुरक्षिततेची भावना निर्माण झाली असल्याचे युनियनने निवेदनात नमूद केले आहे.

या पार्श्वभूमीवर युनियनच्या वतीने मुख्यमंत्री यांना जिल्हाधिकाऱ्यांमार्फत निवेदन देण्यात आले. शिवरे घटनेतील दोषींवर खुनाचा गुन्हा दाखल करून तातडीने अटक करावी आणि प्रकरण जलदगती न्यायालयात चालवावे, अशी प्रमुख मागणी करण्यात आली.

तसेच वर्षभरात वारंवार होणाऱ्या ग्रामसभांची संख्या मर्यादित करून वर्षातून एकच आर्थिक नियोजन व आढावा ग्रामसभा घेण्याची कायदेशीर तरतूद करावी, ग्रामसभेतील अनधिकृत व्हिडिओ चित्रीकरण व सोशल मीडिया माध्यमातून होणाऱ्या बदनामीवर प्रतिबंध घालावा, संवेदनशील व वादग्रस्त ग्रामपंचायतींच्या बैठकींसाठी विनामूल्य पोलीस संरक्षण द्यावे, अशा मागण्या करण्यात आल्या.

कृषी, आरोग्य, समाजकल्याण आदी विभागांच्या योजनांसाठी आयोजित विशेष ग्रामसभांची प्रशासकीय व आयोजनाची जबाबदारी संबंधित विभागांकडे सोपवावी. तसेच वैयक्तिक लाभाच्या योजनांतील लाभार्थी निवड ग्रामसभेत करण्याऐवजी तालुका किंवा पंचायत समिती स्तरावर संबंधित विभागामार्फत पारदर्शक पद्धतीने करण्यात यावी, अशी मागणीही निवेदनातून करण्यात आली.

ग्रामपंचायत अधिकाऱ्यांच्या भावना, त्यांच्या सुरक्षिततेचा प्रश्न आणि कामकाजातील अडचणी शासनाने गांभीर्याने विचारात घेऊन मागण्यांवर तातडीने ठोस निर्णय घ्यावा, अशी अपेक्षा युनियनने व्यक्त केली.

मोर्चाचे नेतृत्व युनियनचे अध्यक्ष शरद भुजबळ, सरचिटणीस दयानंद पाटील, कार्याध्यक्ष नारायण ढवळे, मानद अध्यक्ष सुशेन ननवरे यांच्यासह पदाधिकाऱ्यांनी केले. यावेळी उपाध्यक्ष (महिला) सुनंदा भिमराव बडेकर, कोषाध्यक्ष विठ्ठल आ. लिगाडे, सहसचिव किसन ब. माळी, संघटक प्रदीप भा. काळे, महिला संघटक योगिता, प्रसिद्धी प्रमुख शरद जगदाळे, कायदेशीर सल्लागार पांडुरंग एकतपुरे यांच्यासह जिल्ह्यातील ग्रामपंचायत अधिकारी उपस्थित होते.

जनता संघर्ष न्यूज,सोलापूर 

संपादक – सिद्धार्थ भडकुंबे 

बातम्या व जाहिरातीसाठी संपर्क-9579838240