प्रतिनिधी – सोलापूर,
‘स्वच्छता ही सेवा २०२६’ अभियानांतर्गत ‘एक दिवस, एक तास, एक साथ’ या उपक्रमाचे आयोजन १ ऑक्टोबर २०२६ रोजी सोलापूर जिल्ह्यात व्यापक स्वरूपात करण्यात येणार आहे. जिल्ह्यातील नागरिकांनी या महास्वच्छता अभियानात उत्स्फूर्तपणे सहभागी व्हावे, असे आवाहन जिल्हा परिषदेचे मुख्य कार्यकारी अधिकारी कुशल जैन यांनी केले आहे.
संकल्प सेवा अभियानांतर्गत जिल्ह्यातील ११ तालुक्यांमधील सर्व ग्रामपंचायतींमध्ये सामूहिक श्रमदानाच्या माध्यमातून स्वच्छतेबाबत जनजागृती करणे, तसेच स्वच्छ, सुंदर व निरोगी गावांच्या निर्मितीसाठी लोकसहभाग वाढविणे हा या उपक्रमाचा प्रमुख उद्देश आहे.या उपक्रमांतर्गत सकाळी ८ वाजता ग्रामपंचायत स्तरावर सार्वजनिक ठिकाणे, शाळा परिसर, रस्ते, चौक, पर्यटनस्थळे, मंदिरे, तीर्थक्षेत्रे, प्रार्थनास्थळे, नदी व जलस्रोत परिसर तसेच आवश्यक ठिकाणी सामूहिक श्रमदान व स्वच्छता मोहीम राबविण्यात येणार आहे. यासोबतच कचऱ्याचे योग्य वर्गीकरण, परिसर स्वच्छ ठेवणे आणि स्वच्छतेच्या सवयी अंगीकारण्याबाबत नागरिकांमध्ये जनजागृती केली जाणार आहे.
स्वच्छता ही केवळ एका दिवसाची मोहीम न राहता प्रत्येक गावाची आणि प्रत्येक नागरिकाची दैनंदिन जबाबदारी झाली पाहिजे. १ ऑक्टोबर रोजी प्रत्येकाने किमान एक तास स्वच्छतेसाठी दिल्यास सामूहिक सहभागातून स्वच्छ व निरोगी गावांची निर्मिती अधिक प्रभावीपणे करता येईल.
या अभियानात अधिकारी-कर्मचारी, शाळा-महाविद्यालयीन विद्यार्थी, महिला बचत गट, युवक, स्वयंसेवी संस्था तसेच सर्व नागरिकांनी मोठ्या संख्येने सहभागी होऊन स्वच्छतेचा संदेश घराघरात पोहोचवावा, असे आवाहन मुख्य कार्यकारी अधिकारी कुशल जैन यांनी केले आहे.
जनता संघर्ष न्यूज, सोलापूर
संपादक – सिद्धार्थ भडकुंबे
बातम्या व जाहिरातीसाठी संपर्क – 9579838240
