सोलापूर : प्रतिनिधी
भारत पेट्रोलियम कंपनीकडून गॅस सिलेंडरच्या बुकिंगसाठी तब्बल ४५ दिवसांची मुदत ठेवण्यात आल्याने ग्राहकांना, विशेषतः महिलांना मोठ्या अडचणींचा सामना करावा लागत आहे. या प्रश्नाकडे तातडीने लक्ष देऊन गॅस पुरवठा सुरळीत करण्याची मागणी शिवसेनेच्या वतीने करण्यात आली आहे.
यासंदर्भात जिल्हा पुरवठा अधिकारी, सोलापूर यांच्याकडे निवेदन देण्यात आले. निवेदनात म्हटले आहे की, इराण-अमेरिका युद्धाच्या पार्श्वभूमीवर देशात काही काळ गॅस टंचाईची परिस्थिती निर्माण झाली होती. या परिस्थितीचा सामना करण्यासाठी केंद्र सरकारकडून शहरी व ग्रामीण भागासाठी काही निकष निश्चित करण्यात आले होते. मात्र, युद्धजन्य परिस्थिती निवळल्यानंतरही भारत पेट्रोलियम कंपनीकडून गॅस बुकिंगसाठी ४५ दिवसांची प्रतीक्षा ठेवण्यात आली आहे.
इतर गॅस कंपन्यांकडून सुमारे २५ दिवसांच्या कालावधीनंतर बुकिंगची सुविधा उपलब्ध होत असताना भारत पेट्रोलियमकडून अद्याप ४५ दिवसांची मुदत कायम असल्याने ग्राहकांमध्ये नाराजी आहे. विशेषतः महिलांना स्वयंपाकासाठी गॅस उपलब्ध करून घेण्यासाठी अडचणींचा सामना करावा लागत असल्याने या प्रश्नावर तातडीने सकारात्मक निर्णय घेण्याची मागणी करण्यात आली.
“गॅस सिलेंडरसाठी नागरिकांनी ४५ दिवस वाट पाहायची का? महिलांच्या या ज्वलंत प्रश्नाकडे प्रशासनाने गांभीर्याने पाहण्याची गरज आहे,” अशी भूमिका हिवरकर पाटील यांनी व्यक्त केली.
निवेदनाद्वारे भारत पेट्रोलियम कंपनीकडून होत असलेल्या गॅस पुरवठ्याबाबत योग्य ती चौकशी करून ग्राहकांना नियमित व सुरळीत गॅस पुरवठा उपलब्ध करून देण्याची मागणी करण्यात आली.
यावेळी ओबीसी महासंघाचे प्रदेश उपप्रमुख तानाजीराव साठे, शिवसेनेचे तालुकाप्रमुख तानाजीराव भोळे पाटील, तालुकाप्रमुख शहाजी काळे, पश्चिम महाराष्ट्र रिपब्लिकन पार्टी ऑफ इंडियाचे उपाध्यक्ष एन. के. साळवे, माळशिरस शहर संघटक पोरे भाऊ, विद्यार्थी सेनेचे प्रमुख शिवदत्त भोळे पाटील, दहिगाव शहर प्रमुख दत्ता बोडरे आदी उपस्थित होते.
जनता संघर्ष न्यूज,सोलापूर
संपादक – सिद्धार्थ भडकुंबे
बातम्या व जाहिरातीसाठी संपर्क-9579838240
