प्रतिनिधी – सोलापूर
आरटीओ परिसरातील वृक्षतोडीच्या हालचालींची माहिती मिळताच सोलापूर महानगरपालिकेच्या उपमहापौर सौ. ज्ञानेश्वरी महेश देवकर यांनी तातडीने घटनास्थळी धाव घेत पाहणी केली. अनावश्यक वृक्षतोड कोणत्याही परिस्थितीत होऊ नये, अशा स्पष्ट सूचना त्यांनी संबंधित अधिकाऱ्यांना दिल्याने आरटीओ परिसरातील हिरवाईला मोठा दिलासा मिळाला आहे.
आरटीओ परिसरात एकूण ११३ वृक्ष असून, त्यापैकी ३४ वृक्षतोडीसाठी परवानगी मागण्यात आली होती. यामध्ये शेवरीच्या वृक्षांचा समावेश असल्याने नियमानुसार व मंजूर परवानगीनुसार आवश्यक वृक्षतोड करण्यास परवानगी देण्यात आली आहे. मात्र, वड, पिंपळ यांसारख्या देशी व पर्यावरणाच्या दृष्टीने महत्त्वपूर्ण वृक्षांची तोड न करता त्यांचे पुनर्लागवड करण्यावर भर देण्याचे निर्देश उपमहापौर देवकर यांनी दिले.
पुनर्लागवड शक्य असलेल्या १५ वृक्षांचे रिप्लांटेशन करण्याच्या सूचनाही त्यांनी दिल्या. तसेच परवानगी नसलेल्या कोणत्याही वृक्षाला हात लावू नये आणि वृक्षतोडीच्या प्रक्रियेत सर्व नियमांचे काटेकोर पालन करावे, असे त्यांनी स्पष्ट केले.यावेळी उपमहापौर देवकर यांनी उपप्रादेशिक परिवहन अधिकारी विजय पाटील यांची भेट घेऊन वृक्षतोडीच्या वेळी प्रशासनाने विशेष दक्षता घेण्याची विनंती केली. पर्यावरण संवर्धनाच्या दृष्टीने आवश्यक ती खबरदारी घेण्याचे आश्वासन विजय पाटील यांनी दिले.
वृक्षतोडीची भरपाई नव्हे, हरित क्षेत्र वाढविण्याचा प्रयत्न
दरम्यान, प्रभाग क्रमांक २३ मधील मोकळ्या जागेत ५ फूटांपेक्षा मोठ्या आकाराची सुमारे ५०० वृक्षांची लागवड करण्याचे नियोजन करण्यात आले आहे. वृक्षलागवडीसाठी प्रत्येक झाडामागे ५ हजार रुपये याप्रमाणे ७५ हजार रुपये अनामत रक्कम महापालिकेत जमा करण्यात आली आहे.
प्रादेशिक परिवहन विभाग आणि सोलापूर महानगरपालिका यांच्या समन्वयातून या परिसरात वृक्षलागवड तसेच वृक्षसंवर्धन करण्यात येणार आहे. त्यामुळे आरटीओ परिसरात विकासकामांसोबतच हरित क्षेत्र वाढविण्याच्या प्रयत्नांना चालना मिळणार आहे.उपमहापौर देवकर यांनी घेतलेल्या या भूमिकेमुळे ‘विकास हवा, पण हिरवाईच्या किंमतीवर नको’ असा संदेश देण्यात आला आहे. वृक्षतोडीऐवजी शक्य तिथे पुनर्लागवड आणि त्यासोबत मोठ्या प्रमाणावर नव्याने वृक्षलागवड करण्याचा निर्णय पर्यावरणाच्या दृष्टीने महत्त्वपूर्ण मानला जात आहे.
यावेळी परिवहन निरीक्षक प्रिया रोडगे, आरटीओ विभागातील कर्मचारी, उद्यान विभागातील कर्मचारी तसेच पर्यावरणदूत डॉ. मनोज देवकर आदी उपस्थित होते.
“वृक्षतोड हा शेवटचा पर्याय असावा. शक्य असेल तेथे वृक्षांचे पुनर्लागवड करून त्यांचे संवर्धन करणे आणि त्यासोबत नव्याने वृक्षलागवड करणे हीच काळाची गरज आहे,” असा संदेश उपमहापौर सौ. ज्ञानेश्वरी महेश देवकर यांनी दिला.
जनता संघर्ष न्यूज,सोलापूर
संपादक – सिद्धार्थ भडकुंबे
बातम्या व जाहिरातीसाठी संपर्क-9579838240
