प्रतिनिधी – सोलापूर
सोलापूर शहरात दरोडा टाकण्याच्या तयारीत असलेल्या सात जणांच्या सराईत गुन्हेगारांच्या टोळीला शहर गुन्हे शाखेने शिताफीने जेरबंद केले. एक देशी बनावटीचे पिस्तूल, पाच जिवंत राऊंड, दोन तलवारी, तीन खंजीर, दोन कटावणी, छन्नी, लांब दोरखंड, हॅन्डग्लोज, दोन नंबर प्लेट, कलर स्प्रे, सात मोबाईल, चारचाकी आणि मोटारसायकल असा तब्बल १० लाख २९ हजार ७०० रुपयांचा मुद्देमाल पोलिसांनी जप्त केला आहे.
ही कारवाई २० सप्टेंबर २०२६ रोजी रात्री एमआयडीसी पोलीस ठाण्याच्या हद्दीत, मुळेगाव रोड परिसरात करण्यात आली.
गुप्त माहिती मिळताच पोलिसांचा सापळा
शहरातील मालमत्तेविषयक गुन्ह्यांना आळा घालणे आणि दाखल गुन्ह्यांचा तपास करण्याच्या अनुषंगाने पोलीस आयुक्त एम. राज कुमार यांनी गुन्हे शाखेच्या अधिकारी व कर्मचाऱ्यांना सूचना दिल्या होत्या. गणेशोत्सवाच्या पार्श्वभूमीवर गुन्हे शाखेचे पथक एमआयडीसी परिसरात पेट्रोलिंग करत असताना पोलीस शिपाई अमोल यादव यांना गोपनीय माहिती मिळाली.
अमर ज्योती नगर, नरसिंग नगरजवळ, मुळेगाव रोड येथील प्लॉट क्रमांक ८३ परिसरात काहीजण दरोडा टाकण्याच्या तयारीत जमले असून त्यांच्याकडे घातक शस्त्रे आणि वाहने आहेत, अशी माहिती मिळाली.सहायक पोलीस निरीक्षक भरत चंदनशिव यांनी ही माहिती वरिष्ठ पोलीस निरीक्षक अरविंद माने यांना दिली. त्यानंतर सहायक पोलीस आयुक्त दिलीप पवार आणि वरिष्ठ पोलीस निरीक्षक अरविंद माने यांच्या मार्गदर्शनाखाली पोलिसांचे पथक घटनास्थळी दाखल झाले.
सात संशयितांना शिताफीने पकडले
पोलिसांनी परिसराची पाहणी केली असता एका काळ्या रंगाच्या चारचाकी वाहनाजवळ सात जण संशयास्पदरीत्या थांबलेले आढळून आले. दरोड्यासारखा गंभीर गुन्हा करण्याच्या तयारीत असल्याचा संशय आल्याने पोलिसांनी सापळा रचून सर्व सात जणांना ताब्यात घेतले.
ताब्यात घेतलेल्या आरोपींची नावे पुढीलप्रमाणे आहेत
मनदीपसिंग दयासिंग संधू (४३), नांदेड
बलप्रीतसिंग सतनामसिंग खैरा (२५), नांदेड
अंकुर रामकुमार प्रतापसिंग (२८), जि. पटना, बिहार
लक्ष्मण नामदेव जगताप (३५), छत्रपती संभाजीनगर
सुखदेवसिंग बलविंदरसिंग गिल (४२), पंजाब
दिलीपसिंग हरीसिंग पवार खालसा (३४), नांदेड
राजेश कन्नीराम राठोड (४४), सोलापूर
त्यांच्याकडून महिंद्रा XUV 500 (MH 12 HB 7700) आणि यामाहा मोटारसायकल (TG 07 AJ 6467) अशी दोन वाहनेही मिळून आली.
वाहनात आढळला शस्त्रसाठा
पंचांसमक्ष अंगझडती घेतली असता अंकुर रामकुमार प्रतापसिंग याच्याकडून एक देशी बनावटीचे पिस्तूल आणि पाच जिवंत राऊंड आढळून आले.त्यानंतर वाहनाची तपासणी केली असता त्यामध्ये दोन तलवारी, तीन खंजीर, दोन कटावणी, एक छन्नी, लांब दोरखंड, तीन जोड्या हॅन्डग्लोज, दोन नंबर प्लेट, एक कलर स्प्रे बॉटल आणि सात मोबाईल फोन आढळून आले.
या साहित्याबाबत सुरुवातीला आरोपींनी पोलिसांना समाधानकारक माहिती दिली नाही. मात्र पोलिसांनी अधिक चौकशी केली असता आरोपी राजेश कन्नीराम राठोड याने, पोलिसांच्या म्हणण्यानुसार, त्या रात्री सोलापूर शहरात दरोडा टाकून लूट करण्याची तयारी केली असल्याचे सांगितले.
आरोपींवर यापूर्वीही गंभीर गुन्हे
पोलिसांच्या तपासात अटक केलेल्या आरोपींपैकी काहींवर यापूर्वीच खून, खुनाचा प्रयत्न, दरोडा, जबरी चोरी, घरफोडी आणि हत्यार कायद्यांतर्गत विविध गुन्हे दाखल असल्याचे निष्पन्न झाले आहे.
विशेषतः दिलीपसिंग हरीसिंग पवार खालसा याच्यावर नांदेड, बीड आणि इतर ठिकाणी खून, खुनाचा प्रयत्न, हत्यार कायदा तसेच जबरी चोरीसारखे अनेक गुन्हे दाखल असल्याची माहिती पोलिसांनी दिली आहे. मनदीपसिंग दयासिंग संधू, अंकुर प्रतापसिंग, लक्ष्मण जगताप आणि राजेश राठोड यांच्याविरुद्धही विविध पोलीस ठाण्यांमध्ये गुन्हे दाखल असल्याचे तपासात समोर आले आहे.
१० लाख २९ हजार ७०० रुपयांचा मुद्देमाल जप्त
या कारवाईत पोलिसांनी एकूण १०,२९,७०० रुपयांचा मुद्देमाल जप्त केला आहे. यामध्ये पिस्तूल, जिवंत काडतुसे, धारदार शस्त्रे, दरोड्यासाठी वापरता येणारे साहित्य, मोबाईल, वाहनांचा समावेश आहे.
सातही आरोपींविरुद्ध एमआयडीसी पोलीस ठाण्यात गुन्हा क्रमांक ८४७/२०२६ नुसार भारतीय न्याय संहिता कलम ३१०(४), भारतीय हत्यार कायदा कलम ३/२५, ४/२५ तसेच महाराष्ट्र पोलीस अधिनियम १९५१ मधील कलम ३७(१)(२), १३५ अन्वये गुन्हा दाखल करण्यात आला असून सर्व आरोपींना अटक करण्यात आली आहे.
गुन्हे शाखेची मोठी कारवाई
ही कारवाई पोलीस आयुक्त एम. राज कुमार, पोलीस उपायुक्त (गुन्हे/विशेष शाखा) डॉ. अश्विनी पाटील यांच्या मार्गदर्शनाखाली सहायक पोलीस आयुक्त दिलीप पवार, वरिष्ठ पोलीस निरीक्षक अरविंद माने, सहायक पोलीस निरीक्षक भरत चंदनशिव, निलेश सोनवणे, पोलीस उपनिरीक्षक विजय बनसुडे, मनोज मोरे तसेच गुन्हे शाखेच्या पथकातील अधिकारी व अंमलदारांनी केली.
पोलिसांच्या या कारवाईमुळे सोलापूर शहरात संभाव्य दरोड्याचा प्रयत्न उधळून लावण्यात आला असून, या टोळीचा आणखी कोणत्या गुन्ह्यांशी संबंध आहे का, तसेच जप्त शस्त्रे व साहित्य कुठून आणण्यात आले, याचा पुढील तपास सुरू आहे.
