प्रतिनिधी – सोलापूर
उत्तर सोलापूर तालुक्यातील वीजपुरवठ्याशी संबंधित विविध समस्यांबाबत महावितरणचे अधीक्षक अभियंता सुनील माने यांची भेट घेऊन नागरिक व शेतकऱ्यांना भेडसावणाऱ्या अडचणी त्यांच्या निदर्शनास आणून देण्यात आल्या. यावेळी शिरापूर उपसा सिंचनातील पंपाला नियमित वीजपुरवठा करून तो तातडीने कार्यान्वित करावा, अशी प्रमुख मागणी करण्यात आली.
शिरापूर उपसा सिंचन योजना कार्यान्वित झाल्यास उत्तर सोलापूर तालुक्यातील पाणीपुरवठ्यासाठी आवश्यक प्रमाणात पाणी उपलब्ध होण्यास मदत होणार आहे. त्यामुळे पंपासाठी नियमित वीजपुरवठा करून ही योजना सुरळीत सुरू करण्याची मागणी करण्यात आली.
यासोबतच जळालेला डी.पी. बदलल्यानंतर अवघ्या ३ ते ४ दिवसांत पुन्हा डी.पी. जळत असल्याने यावर कायमस्वरूपी उपाययोजना करावी, शेतकऱ्यांना दिवसा ८ तास नियमित वीजपुरवठा करावा, आवश्यक ठिकाणी नवीन डी.पी. उपलब्ध करून द्यावेत तसेच वीज समस्या तातडीने सोडविण्यासाठी निवासी वायरमनची नियुक्ती करावी, अशा विविध मागण्या करण्यात आल्या.उत्तर सोलापूर तालुक्यातील वीजपुरवठ्याशी संबंधित समस्या तातडीने मार्गी लावून नागरिक व शेतकऱ्यांना दिलासा मिळावा, यासाठी महावितरणने सकारात्मक कार्यवाही करावी, अशी मागणी यावेळी करण्यात आली.
यावेळी अरुण भाऊ बारसकर, विनायक सुतार (जिल्हाध्यक्ष, भाजपा ओबीसी मोर्चा), अमोल साठे, शंकर साठे, महादेव कदम आदी उपस्थित होते.
जनता संघर्ष न्यूज, सोलापूर
बातम्या व जाहिरातीसाठी संपर्क -9579838240
