प्रतिनिधी-अक्कलकोट,
माजी विधानसभा सभापती तथा काँग्रेसचे माजी प्रदेशाध्यक्ष नाना भाऊ पटोले यांनी नुकतीच सपत्निक अक्कलकोट येथील श्री वटवृक्ष स्वामी महाराज मंदिराला भेट देऊन श्री स्वामी समर्थांचे दर्शन घेतले. यावेळी देवस्थान समितीच्या वतीने चेअरमन तथा नगरसेवक महेश इंगळे यांच्या मार्गदर्शनाखाली प्रथमेश इंगळे यांनी नाना भाऊ पटोले यांचा स्वामींचे कृपावस्त्र, प्रसाद आणि प्रतिमा देऊन यथोचित सत्कार केला.सत्कार स्वीकारल्यानंतर बोलताना नाना भाऊ पटोले म्हणाले, “अक्कलकोट ही श्री स्वामी समर्थांच्या चरणस्पर्शाने पावन झालेली भूमी आहे. येथे आल्यावर मनाला अत्यंत शांती आणि समाधान लाभते. देवस्थान मंदिर समितीने भाविकांसाठी उपलब्ध करून दिलेल्या सुविधा, स्वच्छता, शिस्तबद्ध व्यवस्था आणि नियोजन खरोखरच कौतुकास्पद आहे.”ते पुढे म्हणाले की, “चेअरमन महेश इंगळे यांच्या नेतृत्वाखाली देवस्थानचा सर्वांगीण विकास वेगाने होत असून, धार्मिक कार्याबरोबरच सामाजिक आणि शैक्षणिक क्षेत्रातही देवस्थान समितीचे योगदान अत्यंत मोलाचे आहे.”दर्शनानंतर नाना भाऊ पटोले यांनी मंदिर परिसरातील स्वच्छता, भाविकांसाठी उपलब्ध करून दिलेल्या सुविधा आणि व्यवस्थेची पाहणी केली. “स्वामी समर्थांच्या आशीर्वादाने हे देवस्थान जगभरातील भक्तांचे श्रद्धास्थान म्हणून अधिकाधिक उज्ज्वल होवो आणि मला पुन्हा पुन्हा येथे येऊन स्वामींचे दर्शन घेण्याची संधी लाभो,” अशी भावना त्यांनी व्यक्त केली.यावेळी काँग्रेस तालुकाध्यक्ष मल्लिकार्जुन पाटील, देवस्थानचे सचिव आत्माराम घाटगे, विश्वस्त महेश गोगी, विपूल जाधव, श्रीकांत मलवे, समर्थ स्वामी, तुषार मोरे, धनराज स्वामी, स्वप्निल गायकवाड आदी मान्यवर उपस्थित होते.
