प्रतिनिधी- अक्कलकोट
अत्यंत सामान्य कुटुंबातून आलेल्या आणि उदरनिर्वाहासाठी पेंटिंग, पिग्मी एजंट तसेच डिश टीव्ही जोडणीची कामे करणाऱ्या चंद्रकांत इंगळे यांनी आपल्या जिद्द, चिकाटी आणि अथक परिश्रमाच्या जोरावर पोलिस उपनिरीक्षक पदाला गवसणी घातली आहे. महाराष्ट्र लोकसेवा आयोगामार्फत (MPSC) घेण्यात आलेल्या सन २०२५च्या विभागीय परीक्षेत त्यांची राज्य उत्पादन शुल्क विभागात पोलिस उपनिरीक्षकपदी निवड झाली आहे. त्यांच्या या यशामुळे अक्कलकोट स्टेशन परिसरात आनंदाचे वातावरण असून, सर्व स्तरांतून त्यांच्यावर अभिनंदनाचा वर्षाव होत आहे.
त्यांचे इयत्ता दहावी शिक्षण श्री जगद्गुरु पंचाचार्य हायस्कूल गौडगाव(अक्कलकोट स्टेशन) या ठिकाणी तर महाविद्यालयीन शिक्षण सी.बी. खेडगी’ज कॉलेज अक्कलकोट या ठिकाणी पूर्ण झाले.
चंद्रकांत इंगळे यांचा हा यशस्वी प्रवास अनेकांसाठी प्रेरणादायी ठरला आहे. अत्यंत प्रतिकूल आर्थिक परिस्थितीतही त्यांनी शिक्षणाची कास सोडली नाही. शिक्षण घेत असतानाच कुटुंबाला आर्थिक हातभार लागावा म्हणून त्यांनी पेंटिंगची कामे केली. त्यानंतर पिग्मी एजंट म्हणून काम केले, तसेच डिश टीव्ही जोडणीची कामेही केली. परिस्थिती कितीही कठीण असली तरी शिक्षण आणि स्पर्धा परीक्षेचे स्वप्न त्यांनी मनातून कधीही दूर होऊ दिले नाही.
२०१२ मध्ये राज्य उत्पादन शुल्क विभागात कॉन्स्टेबल म्हणून भरती झाल्यानंतर त्यांच्या आयुष्याला नवी दिशा मिळाली. मात्र, मिळालेल्या नोकरीवर समाधान न मानता त्यांनी अधिकारी होण्याचे ध्येय कायम ठेवले. नोकरीची जबाबदारी सांभाळत त्यांनी स्पर्धा परीक्षेचा अभ्यास सुरू ठेवला. ड्युटी, कौटुंबिक जबाबदाऱ्या आणि अभ्यास यांचा समतोल साधत त्यांनी अनेक अडचणींवर मात केली.अनेकदा परिस्थिती माणसाची परीक्षा घेते; मात्र त्या परिस्थितीसमोर हार न मानता जो सातत्याने प्रयत्न करतो, तोच यशाची नवी वाट निर्माण करतो. चंद्रकांत इंगळे यांनी हे आपल्या कृतीतून सिद्ध केले आहे. कष्टाचे काम लहान-मोठे नसते आणि ध्येय मोठे असेल तर परिस्थिती अडथळा ठरत नाही, हा संदेश त्यांच्या यशातून अधोरेखित झाला आहे.सध्या पुणे येथे कार्यरत असलेल्या इंगळे यांनी नोकरी सांभाळत स्पर्धा परीक्षेची तयारी करून मिळविलेले यश अक्कलकोट स्टेशन परिसरातील युवकांसाठी विशेष प्रेरणादायी ठरले आहे. त्यांच्या यशामुळे ग्रामीण भागातील आणि प्रतिकूल परिस्थितीतून पुढे येणाऱ्या तरुणांना नवी उमेद मिळाली असून, मेहनत, सातत्य आणि जिद्द असेल तर कोणतेही ध्येय गाठता येते, हे त्यांनी आपल्या यशातून दाखवून दिले आहे.
चंद्रकांत इंगळे यांच्या या उल्लेखनीय यशाबद्दल अक्कलकोट स्टेशन परिसरातून त्यांचे अभिनंदन होत असून, त्यांच्या पुढील वाटचालीसाठी शुभेच्छांचा वर्षाव होत आहे.
जनता संघर्ष न्यूज,सोलापूर
संपादक-सिद्धार्थ भडकुंबे
बातम्या व जाहिरातीसाठी संपर्क-9579838240
