प्रतिनिधी – सोलापूर
येथील नामांकित नागेश करजगी ऑर्किड स्कूलमध्ये ‘शिक्षक दिन’ मोठ्या उत्साहात आणि आनंदी वातावरणात साजरा करण्यात आला. विद्यार्थ्यांच्या आयुष्याला योग्य दिशा देणाऱ्या, ज्ञानाचा प्रकाश पसरविणाऱ्या आणि संस्कारक्षम पिढी घडविणाऱ्या शिक्षकांना समर्पित हा दिवस विविध उपक्रमांनी साजरा करण्यात आला.
कार्यक्रमाची सुरुवात प्रमुख पाहुणे साहित्यिक प्रा. शिवाजी शिंदे सर यांच्या हस्ते भारताचे माजी राष्ट्रपती व महान शिक्षणतज्ज्ञ डॉ. सर्वपल्ली राधाकृष्णन यांच्या प्रतिमेचे पूजन व दीपप्रज्वलन करून करण्यात आली. यावेळी शाळेचे व्यवस्थापक अक्षय चिडगुंपी, शाळेच्या मार्गदर्शिका मीना पारखे, प्राचार्या रश्मी कुंभार, शाळेच्या समुपदेशिका डॉ. पद्मजा गांधी आदी मान्यवर उपस्थित होते.यावेळी बोलताना प्राचार्या रश्मी कुंभार यांनी शिक्षकी पेशाचे महत्त्व अधोरेखित केले. शिक्षक केवळ पुस्तकी ज्ञान देत नाहीत, तर विद्यार्थ्यांमध्ये नैतिक मूल्ये रुजवून त्यांना देशाचे सुजाण आणि जबाबदार नागरिक बनविण्याचे महत्त्वपूर्ण कार्य करतात, असे त्यांनी सांगितले.
कार्यक्रमाचे प्रमुख पाहुणे प्रा. शिवाजी शिंदे यांनी आपल्या मनोगतातून का शिकवावे, काय शिकवावे आणि कसे शिकवावे याविषयी विद्यार्थ्यांना व शिक्षकांना मार्गदर्शन केले. त्यांच्या विचारांनी उपस्थितांना प्रेरणा मिळाली.या सोहळ्याचे मुख्य आकर्षण म्हणजे शाळेतील इयत्ता दहावीच्या विद्यार्थ्यांनी एका दिवसासाठी शिक्षकांची भूमिका स्वीकारून शाळेचा संपूर्ण कारभार सांभाळला. विद्यार्थ्यांनी प्राचार्य, पर्यवेक्षक तसेच विविध विषयांचे शिक्षक बनून वर्गांमध्ये अध्यापन केले. शिक्षक म्हणून अध्यापनाचा अनुभव घेताना विद्यार्थ्यांमध्ये कमालीचा उत्साह आणि आनंद पाहायला मिळाला. या उपक्रमातून विद्यार्थ्यांना शिक्षकांच्या जबाबदाऱ्या आणि कार्याची प्रत्यक्ष जाणीव झाली.
याप्रसंगी संस्थेचे अध्यक्ष डॉ. कुमारदादा करजगी व संस्थेच्या सचिवा सौ. वर्षाताई विभुते यांनी सर्व शिक्षकांना शिक्षक दिनाच्या शुभेच्छा दिल्या. वर्षभर विद्यार्थ्यांसाठी अविरत कार्य करणाऱ्या शिक्षकांचा प्रमुख पाहुण्यांच्या हस्ते भेटवस्तू देऊन गौरव करण्यात आला.
कार्यक्रमाचे सूत्रसंचालन व आभार प्रदर्शन काजल कुलकर्णी यांनी केले. हा उपक्रम यशस्वी करण्यासाठी शाळेचे व्यवस्थापन, शिक्षक, विद्यार्थी प्रतिनिधी आणि शिक्षकेतर कर्मचाऱ्यांनी विशेष सहकार्य केले.
शिक्षकांविषयी कृतज्ञता व्यक्त करतानाच विद्यार्थ्यांना शिक्षकाच्या भूमिकेचा प्रत्यक्ष अनुभव देणारा हा आगळावेगळा उपक्रम सर्वांसाठी संस्मरणीय ठरला.
जनता संघर्ष न्यूज,सोलापूर
संपादक – सिद्धार्थ भडकुंबे
बातम्या व जाहिरातीसाठी संपर्क -9579838240
