प्रतिनिधी – अक्कलकोट
अक्कलकोट तालुक्यातील प्रभारी गटशिक्षणाधिकारी यांच्या कारभाराबाबत करण्यात आलेल्या विविध तक्रारींवर अद्याप कारवाई न झाल्याचा आरोप करत मागासवर्गीय शिक्षक संघटनेचे अक्कलकोट तालुका माजी अध्यक्ष महांतेश्वर हनुमंतराव कट्टीमनी यांनी येत्या 2 ऑक्टोबर, गांधी जयंतीपर्यंत निर्णय न झाल्यास जिल्हा परिषद सोलापूर कार्यालयासमोर आत्मदहन करण्याचा इशारा दिला आहे.याबाबत त्यांनी जिल्हा परिषद सोलापूरचे मुख्य कार्यकारी अधिकारी तसेच प्राथमिक शिक्षणाधिकारी यांना निवेदन दिले आहे. निवेदनात म्हटले आहे की, अक्कलकोट तालुक्यात गेल्या दोन वर्षांपासून प्रभारी गटशिक्षणाधिकारी प्रशांत अरबाळे यांच्या कारभाराबाबत अनेक तक्रारी करण्यात आल्या आहेत. त्यांनी पदभार स्वीकारल्यापासून अधिकारांचा गैरवापर करून शिक्षकांच्या अनेक प्रतिनियुक्त्या करण्यात आल्याचा आरोपही कट्टीमनी यांनी केला आहे.
या प्रतिनियुक्त्यांबाबत सप्टेंबर 2024 मध्ये मुख्य कार्यकारी अधिकारी यांच्याकडे तक्रार दाखल करण्यात आली होती. त्यानंतर चौकशी समिती नेमण्यात आली असून चौकशीचा अहवाल 16 जानेवारी 2025 रोजी मुख्य कार्यकारी अधिकारी यांच्याकडे सादर करण्यात आल्याचे निवेदनात नमूद करण्यात आले आहे. मात्र, चौकशी अहवालानंतरही अद्याप संबंधित प्रकरणात ठोस कारवाई करण्यात आली नसल्याचा आरोप करण्यात आला आहे.संबंधित फाईल शिक्षण विभागाकडे पाठविण्यात आल्याचा जावक क्रमांक 1916209 असून, दिनांक 4 ऑगस्ट 2025 असल्याचे कट्टीमनी यांनी म्हटले आहे. मात्र, त्यानंतरही कारवाईबाबतची प्रक्रिया पूर्ण झाली नसल्याने शिक्षकांमध्ये नाराजी असल्याचे त्यांनी सांगितले.कट्टीमनी यांनी यापूर्वीही या प्रकरणाच्या निषेधार्थ अनेक वेळा उपोषण केले असून आत्मदहनाचा प्रयत्न केल्याचा दावा केला आहे. तसेच उपोषणादरम्यान प्रशासनाकडून आंदोलन मागे घेण्याबाबत पत्रव्यवहार करण्यात आल्याचेही त्यांनी म्हटले आहे.
निवेदनात प्रभारी गटशिक्षणाधिकारी यांच्याविरोधात काही महिला शिक्षकांच्या तक्रारी असल्याचाही उल्लेख करण्यात आला आहे. तसेच कथित वसुलीबाबतचे ऑडिओ रेकॉर्डिंग तत्कालीन मुख्य कार्यकारी अधिकारी आणि शिक्षणाधिकारी यांना ऐकविण्यात आल्याचा दावा करण्यात आला आहे. या सर्व तक्रारी व पुरावे सादर करूनही संबंधितांवर कारवाई का होत नाही, असा सवाल कट्टीमनी यांनी उपस्थित केला आहे.
“संबंधित अधिकाऱ्यांविरोधात वारंवार तक्रारी, पुरावे आणि तब्बल 40 दिवसांचे उपोषण करूनही कारवाई होत नसल्याने प्रशासनाच्या कार्यपद्धतीबाबत गंभीर प्रश्न निर्माण झाले आहेत. येत्या 2 ऑक्टोबर, गांधी जयंतीपर्यंत या प्रकरणात योग्य निर्णय व कारवाई न झाल्यास जिल्हा परिषद सोलापूर कार्यालयासमोर आत्मदहन करणार आहे,” असा इशारा महांतेश्वर हनुमंतराव कट्टीमनी यांनी निवेदनाद्वारे दिला आहे.दरम्यान, या प्रकरणातील आरोपांबाबत संबंधित प्रशासन व प्रभारी गटशिक्षणाधिकारी यांची बाजू अद्याप समोर आलेली नाही. त्यामुळे प्रशासनाने या तक्रारींची सखोल चौकशी करून योग्य निर्णय घ्यावा, अशी मागणी करण्यात येत आहे.
जनता संघर्ष न्यूज,सोलापूर
बातम्या व जाहिरातीसाठी संपर्क – 9579838240
