दक्षिण सोलापूर | प्रतिनिधी
दक्षिण सोलापूर तालुक्यातील मुस्ती येथे विद्युत डीपीमध्ये झालेल्या शॉर्टसर्किटमुळे सात एकर ऊस जळून खाक झाल्याची घटना घडली. या आगीत शेतकरी रामेश्वर अंदाणी पडोळकर यांचे अंदाजे ७ ते ८ लाख रुपयांचे नुकसान झाल्याचा प्राथमिक अंदाज आहे.
पडोळकर यांनी मोठ्या कष्टाने आणि मेहनतीने सात एकर ऊस पीक जोपासले होते. मात्र, शेतातील ४४० व्होल्टच्या विद्युत डीपीमध्ये शॉर्टसर्किट झाल्याने अचानक ठिणगी पडली आणि काही क्षणांतच आगीने रौद्ररूप धारण केले. वाऱ्यामुळे आग झपाट्याने पसरत गेली आणि पाहता पाहता संपूर्ण सात एकर ऊस आगीच्या भक्ष्यस्थानी पडला.
दुष्काळी परिस्थिती, वाढता उत्पादन खर्च आणि कर्जाचा ताण यामुळे आधीच अडचणीत असलेल्या शेतकऱ्याला या घटनेमुळे मोठा आर्थिक फटका बसला आहे. विद्युत यंत्रणेच्या देखभालीबाबतही प्रश्न उपस्थित होत असून, महावितरणच्या संबंधित यंत्रणेने या घटनेची पाहणी करून वस्तुस्थिती स्पष्ट करावी, अशी मागणी होत आहे.
दरम्यान, नुकसानग्रस्त शेतकऱ्याला शासनाकडून तातडीने आर्थिक मदत मिळावी, तसेच नुकसानीचा योग्य पंचनामा करून भरपाईची कार्यवाही करावी, अशी अपेक्षा मुस्ती ग्रामस्थांकडून व्यक्त होत आहे. पंचनामा होऊन पुढील कार्यवाही काय होते आणि शेतकरी रामेश्वर पडोळकर यांना किती मदत मिळते, याकडे ग्रामस्थांचे लक्ष लागले आहे.
जनता संघर्ष न्यूज,सोलापूर
संपादक – सिद्धार्थ भडकुंबे
बातम्या व जाहिरातीसाठी संपर्क -9579838240
