प्रतिनिधी – शिरवळवाडी(अक्कलकोट)

महावितरणच्या विद्युत तारांमधून शॉर्टसर्किट झाल्याने शिरवळवाडी येथील महिला शेतकरी लक्ष्मीबाई मल्लिकार्जुन मारलभावी यांच्या गट क्रमांक ७३/२/अ मधील तब्बल २.२५ एकर ऊस जळून खाक झाल्याची घटना घडली. या घटनेत शेतकऱ्याचे मोठे आर्थिक नुकसान झाले असून, नुकसानभरपाई मिळावी यासाठी ग्रामस्थांनी रस्ता आंदोलन करत प्रशासनाचे लक्ष वेधले.
महावितरणच्या विद्युत तारांमधून झालेल्या शॉर्टसर्किटमुळे उसाला आग लागल्याचा आरोप करण्यात येत आहे. या आगीत उभा ऊस जळून खाक झाल्याने महिला शेतकरी लक्ष्मीबाई मारलभावी यांच्यासमोर आर्थिक संकट उभे राहिले आहे. ऊस लागवड, खते, औषधे, पाणी आणि मशागतीसाठी केलेला खर्च वाया गेल्याने त्यांना मोठा आर्थिक फटका बसला आहे.
पंचनामा करून तातडीने नुकसानभरपाई द्या
घटनेची तातडीने दखल घेऊन जळालेल्या उसाचा अधिकृत पंचनामा करावा, नुकसानीचे योग्य मूल्यमापन करावे आणि संबंधित महिला शेतकऱ्याला नियमानुसार नुकसानभरपाई मिळवून द्यावी, अशी मागणी ग्रामस्थांनी केली आहे. या मागणीसाठी ग्रामस्थांनी रस्ता आंदोलन करून प्रशासन आणि महावितरणकडे तातडीच्या कार्यवाहीची मागणी केली.
शेतीच्या खर्चाचा भार, त्यात आगीचे संकट
आधीच शेतीचा वाढता खर्च, पाणीटंचाई आणि विविध अडचणींमुळे शेतकरी त्रस्त आहेत. त्यातच मेहनतीने उभे केलेले ऊसपीक आगीत नष्ट झाल्याने मारलभावी कुटुंबाचे आर्थिक गणित कोलमडले आहे. हातातोंडाशी आलेला घास हिरावला गेल्याने या महिला शेतकऱ्यांवर मोठे संकट ओढवले आहे.
संबंधित विभागाने या घटनेची तातडीने चौकशी करून पंचनामा पूर्ण करावा आणि नुकसानग्रस्त महिला शेतकऱ्याला योग्य नुकसानभरपाई मिळवून द्यावी, अशी मागणी शिरवळवाडी येथील ग्रामस्थांकडून होत आहे. आता प्रशासन आणि महावितरण या प्रकरणी किती तत्परतेने कार्यवाही करतात आणि नुकसानग्रस्त शेतकऱ्याला न्याय मिळतो का, याकडे ग्रामस्थांचे लक्ष लागले आहे.
जनता संघर्ष न्यूज सोलापूर
बातम्या व जाहिरातीसाठी संपर्क – 9579838240

















