सोरेगाव शाळेतील दिव्यांग विद्यार्थ्यांच्या पालकांशी न्यायाधीश डॉ. शब्बीर औटी यांचा संवाद; सिंदखेड व सोरेगावच्या शैक्षणिक उपक्रमांचे कौतुक, धोकादायक खोल्यांच्या दुरुस्तीचे निर्देश…

प्रतिनिधी – सोलापूर सोलापूर,
मुंबई उच्च न्यायालयाच्या औरंगाबाद खंडपीठातील जनहित याचिका क्र. १/२०१८ अंतर्गत जिल्हास्तरावर गठित करण्यात आलेल्या तपासणी समितीने उत्तर व दक्षिण सोलापूर तालुक्यातील जिल्हा परिषदांच्या सात शाळांना अचानक भेटी देऊन शाळांमधील भौतिक सुविधा, विद्यार्थ्यांची सुरक्षितता, शैक्षणिक गुणवत्ता आणि विविध शासकीय योजनांच्या अंमलबजावणीची तपासणी केली.

या तपासणीदरम्यान कुमठे मराठी, कुमठे उर्दू, कुलकर्णी तांडा, मद्रे, सिंदखेड, हत्तूर मराठी मुले, हत्तूर मुली, हत्तूर उर्दू आणि सोरेगाव येथील शाळांची पाहणी करण्यात आली. सकाळी १०.३० वाजता सुरू झालेल्या या तपासणीमध्ये शाळांची स्वच्छता, पिण्याचे पाणी, स्वच्छतागृहे, वर्गखोल्या, विद्यार्थी लाभाच्या योजना, अध्यापन पद्धती आणि प्रधानमंत्री पोषणशक्ती निर्माण योजनेचा आढावा घेण्यात आला.
सोरेगाव जिल्हा परिषद शाळेत समितीने दिव्यांग विद्यार्थ्यांच्या पालकांशी संवाद साधून विद्यार्थ्यांना मिळणाऱ्या शैक्षणिक सुविधा, शासकीय लाभाच्या योजना आणि आवश्यक सोयीसुविधांबाबत माहिती घेतली. विद्यार्थ्यांना मिळणाऱ्या सुविधांबाबत पालकांची विचारपूस करण्यात आली. यावेळी पालकांनी समाधान व्यक्त केले. समितीने विद्यार्थ्यांच्या गरजांनुसार आवश्यक सुविधा उपलब्ध करून देण्याबाबतही आढावा घेतला.
सिंदखेड व सोरेगाव शाळांमधील इंग्रजी भाषा संवाद उपक्रम, इंग्रजी वाचन, संगणक शिक्षण, विज्ञान प्रयोगशाळा, विद्यार्थ्यांची शिस्त, स्काऊट-गाईड उपक्रम, शिष्यवृत्ती व प्रज्ञाशोध परीक्षेची तयारी तसेच विविध नाविन्यपूर्ण शैक्षणिक उपक्रमांची समितीने विशेष दखल घेत कौतुक केले. शिक्षक, पालक आणि शाळा व्यवस्थापन समितीच्या लोकसहभागातून करण्यात आलेली शाळांची रंगरंगोटी व शैक्षणिक वातावरण निर्मितीबाबतही समाधान व्यक्त करण्यात आले.
तपासणीदरम्यान मद्रे येथील सात वर्गखोल्या धोकादायक अवस्थेत असल्याचे, काही वर्गखोल्यांमधील प्लास्टर निघाल्याचे निदर्शनास आले. तसेच हत्तूर, कुलकर्णी तांडा आणि मद्रे येथील पिण्याच्या पाण्याची व्यवस्था, काही शाळांमधील दिव्यांग विद्यार्थ्यांसाठीच्या स्वच्छतागृहांची दुरवस्था, कुमठे उर्दू व कुलकर्णी तांडा येथील शाळांमध्ये रॅम्प आणि ग्रीलचा अभाव आढळून आला. बंद व धोकादायक खोल्यांमधील डेड स्टॉक आणि अडगळ तातडीने हटविण्याच्या सूचना देण्यात आल्या.
हत्तूर येथील मुलींच्या शाळेसह इतर शाळांमधील मुली व महिला शिक्षकांच्या स्वच्छतागृहांची दुरुस्ती करण्याबाबत कार्यवाहीचे निर्देश देण्यात आले. हत्तूर उर्दू शाळेतील स्वयंपाकगृहाजवळील भिंतीला तडे गेल्याचे निदर्शनास आल्याने विद्यार्थ्यांच्या सुरक्षिततेच्या दृष्टीने तातडीने दुरुस्ती करण्याच्या सूचना देण्यात आल्या.
कुमठे मराठी शाळेतील शिक्षकांच्या अनुपस्थिती व उशिरा येण्याबाबत शिक्षण विभागाने चौकशी करून योग्य ती कार्यवाही करावी, असे निर्देश देण्यात आले. शिक्षकांच्या विलंबामुळे विद्यार्थ्यांच्या शैक्षणिक गुणवत्तेवर परिणाम होऊ नये, यासाठी आवश्यक उपाययोजना करण्यासही सांगण्यात आले. कुमठे उर्दू शाळेतील परिपाठाचे निरीक्षण करण्यात आले. सर्व शाळांमध्ये प्रधानमंत्री पोषणशक्ती निर्माण योजनेअंतर्गत विद्यार्थ्यांना दिल्या जाणाऱ्या अन्नधान्याच्या गुणवत्तेबाबत कोणतीही तडजोड करू नये, असे स्पष्ट निर्देश समितीने दिले.
या जिल्हास्तरीय तपासणी समितीचे अध्यक्ष तथा माजी प्रमुख जिल्हा व सत्र न्यायाधीश डॉ. शब्बीर औटी, उपजिल्हाधिकारी यांचे प्रतिनिधी नायब तहसीलदार अश्विनी दराडे, सार्वजनिक बांधकाम विभागाचे कार्यकारी अभियंता यांचे प्रतिनिधी कनिष्ठ अभियंता, पोलीस अधीक्षक ग्रामीण यांचे प्रतिनिधी पोलीस उपनिरीक्षक, प्राथमिक व माध्यमिक शिक्षणाधिकारी यांचे प्रतिनिधी तसेच विविध विभागांचे अधिकारी आणि हत्तूर केंद्राचे केंद्रप्रमुख उपस्थित होते.
शाळांच्या तपासणीदरम्यान जिल्हा समन्वयक बापूराव जमादार यांनीही राहून शाळांमधील शैक्षणिक उपक्रम व विद्यार्थ्यांना मिळणाऱ्या सुविधांची माहिती दिली.
जनता संघर्ष न्यूज,सोलापूर
संपादक – सिद्धार्थ भडकुंबे
बातम्या व जाहिरातीसाठी संपर्क – 9579838240
















