
प्रतिनिधी – सोलापूर
सोलापूर जिल्हा व सत्र न्यायालयासह शहरातील इतर न्यायालयांना बॉम्बने उडवून देण्याची धमकी ई-मेलद्वारे देण्यात आल्याची धक्कादायक माहिती समोर आली आहे. न्यायालयाचे कामकाज सुरू असतानाच हा धमकीचा ई-मेल प्राप्त झाल्याची माहिती एका वकिलाने दिली आहे.
मिळालेल्या प्राथमिक माहितीनुसार, दुपारी ३ वाजून ३० मिनिटांनी स्फोट घडवून आणण्याची धमकी ई-मेलमध्ये देण्यात आल्याचे सांगण्यात येत आहे. तसेच धमकी देणाऱ्यांनी दहशतवादी संघटनेशी संबंधित असल्याचा दावा केल्याची माहिती समोर आली आहे.
या घटनेची माहिती मिळताच न्यायालयातील कामकाज तातडीने थांबविण्यात आले. खबरदारीचा उपाय म्हणून न्यायालयातील अधिकारी, कर्मचारी, वकील आणि नागरिकांना बाहेर काढण्यात आले. त्यामुळे न्यायालय परिसरात मोठी धावपळ उडाली.
दरम्यान, बॉम्ब शोधक व नाशक पथक घटनास्थळी रवाना झाले असून अग्निशमन दलाची गाडीदेखील न्यायालय परिसराकडे मार्गस्थ झाली आहे. पोलीस यंत्रणा घटनास्थळी सतर्क झाली असून नागरिकांना न्यायालय परिसरापासून दूर राहण्याचे आवाहन करण्यात येत आहे.
नेमकी ही धमकी खरी आहे की अफवा, याबाबत अद्याप अधिकृत माहिती समोर आलेली नाही. सुरक्षा यंत्रणांकडून तपासणी सुरू असून तपासणीनंतरच वस्तुस्थिती स्पष्ट होणार आहे.
जनता संघर्ष न्यूज, सोलापूर
बातम्या व जाहिरातीसाठी संपर्क – 9579838240
















