मंत्री प्रताप सरनाईक यांना निवेदन; लवकरच कर्मचारी उपलब्ध करून देण्याचे आश्वासन.

प्रतिनिधी – सोलापूर
महाराष्ट्र राज्याचे परिवहन मंत्री प्रताप सरनाईक यांच्या सोलापूर-धाराशिव दौऱ्यादरम्यान शिवसेनेचे सोलापूर जिल्हाप्रमुख राजकुमार हिवरकर-पाटील यांनी अकलूज एसटी बस डेपोसाठी २० चालक आणि २० वाहक तातडीने उपलब्ध करून देण्याची मागणी केली. यासंदर्भात त्यांनी परिवहनमंत्र्यांना निवेदन सादर केले.
अकलूज बस डेपोअंतर्गत ग्रामीण तसेच शहरी भागातील प्रवाशांना नियमित आणि सुरळीत बससेवा उपलब्ध करून दिली जाते. मात्र, सध्या डेपोमध्ये चालक आणि वाहकांची संख्या अपुरी असल्याने उपलब्ध एसटी बसेस नियमितपणे चालविण्यात अडचणी निर्माण होत आहेत. परिणामी काही बसफेऱ्या बंद अथवा कमी झाल्यामुळे विद्यार्थी, नोकरदार, महिला, ज्येष्ठ नागरिक आणि सर्वसामान्य प्रवाशांना गैरसोयींचा सामना करावा लागत आहे.

विशेष म्हणजे, परिवहनमंत्री प्रताप सरनाईक यांच्या सहकार्याने आणि मागणीनुसार अकलूज बस डेपोसाठी २० नवीन एसटी बसेस उपलब्ध करून देण्यात आल्या आहेत. मात्र, बसेस उपलब्ध असूनही पुरेशा चालक व वाहकांअभावी त्यांचा पूर्ण क्षमतेने वापर करता येत नसल्याची बाब हिवरकर-पाटील यांनी निवेदनातून निदर्शनास आणून दिली.
अकलूज बस डेपोसाठी तातडीने २० चालक आणि २० वाहक उपलब्ध करून दिल्यास बंद पडलेल्या तसेच कमी झालेल्या बसफेऱ्या पुन्हा नियमित करता येतील. त्यामुळे ग्रामीण भागातील वाडी-वस्त्यांपर्यंत एसटीची सेवा पोहोचण्यास मदत होईल आणि विद्यार्थी, नोकरदारांसह सर्वसामान्य प्रवाशांना मोठा दिलासा मिळेल, अशी मागणी त्यांनी केली.
या निवेदनाची परिवहनमंत्री प्रताप सरनाईक यांनी तातडीने दखल घेत संबंधित मागणीची लवकरच पूर्तता करण्यात येईल, असे आश्वासन दिल्याची माहिती राजकुमार हिवरकर-पाटील यांनी दिली.
मंत्र्यांच्या आश्वासनामुळे अकलूज एसटी डेपोला आवश्यक मनुष्यबळ उपलब्ध होण्याची अपेक्षा व्यक्त होत असून, लवकरच लालपरी पुन्हा शहरापासून ग्रामीण भागातील वाडी-वस्त्यांपर्यंत नियमित धावताना दिसेल, अशी आशा प्रवाशांमधून व्यक्त होत आहे.
जनता संघर्ष न्यूज, सोलापूर
संपादक – सिद्धार्थ भडकुंबे
बातम्या व जाहिरातीसाठी संपर्क – 9579838240















