
प्रतिनिधी – सोलापूर
प्रवाशांना सुरक्षित, स्वच्छ आणि दर्जेदार प्रवासाचा अनुभव मिळावा, यासाठी एसटी महामंडळाने बसस्थानकांमधील मूलभूत सुविधांकडे अधिक गांभीर्याने लक्ष देण्याची गरज आहे. सोलापूर मध्यवर्ती बसस्थानकात यापूर्वीच्या तुलनेत स्वच्छतेत काही सुधारणा झाल्याचे दिसून येत असले, तरी आणखी सुधारणा करण्याची आवश्यकता आहे. त्यामुळे स्वच्छतेसह पिण्याचे पाणी, स्वच्छतागृहे आणि इतर प्रवासी सुविधांना प्राधान्य द्यावे, असे स्पष्ट निर्देश परिवहन मंत्री तथा महाराष्ट्र राज्य मार्ग परिवहन महामंडळाचे अध्यक्ष प्रताप सरनाईक यांनी दिले.

मंत्री प्रताप सरनाईक यांनी मंगळवारी सोलापूर मध्यवर्ती बसस्थानकाला भेट देऊन विविध सुविधांची प्रत्यक्ष पाहणी केली. यावेळी त्यांनी स्वच्छतागृहे, पिण्याच्या पाण्याची व्यवस्था तसेच बसस्थानक परिसरातील स्वच्छतेची स्थिती जाणून घेतली. काही प्रमाणात सुधारणा झाल्याबद्दल समाधान व्यक्त करतानाच स्वच्छतेच्या बाबतीत अधिक प्रयत्न करण्याची गरज त्यांनी अधोरेखित केली. बसस्थानक परिसर स्वच्छ आणि आरोग्यदायी ठेवण्यासाठी अधिकाऱ्यांनी नियमित देखरेख करावी, अशा सूचनाही त्यांनी दिल्या.

प्रवाशांशी थेट संवाद साधत जाणून घेतल्या समस्या
बसस्थानकाच्या पाहणीदरम्यान मंत्री सरनाईक यांनी प्रवाशांशी संवाद साधून त्यांच्या अडचणी आणि अपेक्षा जाणून घेतल्या. एसटी महामंडळाच्या नवीन बसगाड्यांबाबत प्रवाशांनी समाधान व्यक्त केले. मात्र, चांगल्या बसगाड्यांसोबतच बसस्थानकातील स्वच्छता, पिण्याचे पाणी, स्वच्छतागृहे आणि इतर मूलभूत सुविधाही दर्जेदार असणे आवश्यक असल्याचे प्रवाशांनी निदर्शनास आणून दिले.
यावेळी दोन प्रमुख शहरांदरम्यान विनावाहक बससेवा सुरू करण्याची मागणीही प्रवाशांकडून करण्यात आली. प्रवाशांच्या सूचनांची दखल घेत मंत्री सरनाईक यांनी संबंधित एसटी अधिकाऱ्यांना आवश्यक त्या सुधारणा करण्याच्या सूचना दिल्या.
पाहणीसोबतच प्रत्यक्ष अंमलबजावणीही महत्त्वाची!
बसस्थानकाची पाहणी करून सूचना देण्याबरोबरच त्यांची प्रत्यक्ष अंमलबजावणी होणेही तितकेच महत्त्वाचे आहे. स्वच्छतागृहांची नियमित स्वच्छता, पिण्याच्या पाण्याची पुरेशी उपलब्धता, बसस्थानक परिसराची निगा आणि प्रवाशांच्या तक्रारींचे वेळेत निराकरण याकडे प्रशासनाने सातत्याने लक्ष देण्याची गरज आहे.
प्रवाशांचे समाधान हेच एसटी महामंडळाच्या सेवेचे महत्त्वाचे मापदंड असले पाहिजे. त्यामुळे स्थानिक प्रशासनाने प्रवाशांच्या अडचणी समजून घेत आवश्यक सुविधा उपलब्ध करून द्याव्यात, असे आवाहन परिवहन मंत्री प्रताप सरनाईक यांनी केले.
जनता संघर्ष न्यूज, सोलापूर
संपादक -सिद्धार्थ भडकुंबे
बातम्या व जाहिरातीसाठी संपर्क – 9579838240















