गावनिहाय नाल्यांची माहिती संकलित करून जलसंधारणाच्या कामांना गती द्या; जलजीवन मिशनच्या अपूर्ण कामांवरही लक्ष केंद्रित.

प्रतिनिधी – सोलापूर
जिल्ह्यातील पाणीटंचाईवर मात करण्यासाठी जलसंधारणाच्या कामांचे प्रभावी नियोजन करावे. प्रत्येक गावातील नाल्यांची सविस्तर माहिती संकलित करून जलसंधारणाच्या कामांना गती द्यावी. तसेच जलजीवन मिशनअंतर्गत किरकोळ अडचणींमुळे पाणीपुरवठा सुरू होऊ शकत नसलेल्या योजनांची गांभीर्याने दखल घेऊन आवश्यक कार्यवाही करावी आणि नागरिकांना नियमित पाणीपुरवठा होईल, याची दक्षता घ्यावी, असे निर्देश जिल्हा परिषदेचे अध्यक्ष तथा जल व्यवस्थापन व स्वच्छता समितीचे सभापती दीपक वैद्य यांनी दिले.

सोलापूर जिल्हा परिषदेच्या यशवंतराव चव्हाण सभागृहात आयोजित जल व्यवस्थापन व स्वच्छता समितीच्या बैठकीत ते बोलत होते. यावेळी जिल्ह्यातील पाणीटंचाईची सद्यस्थिती, जलजीवन मिशनअंतर्गत पाणीपुरवठा योजनांची अंमलबजावणी, जलसंधारण योजनांची दुरुस्ती आणि गावनिहाय नाल्यांची माहिती संकलित करण्याबाबत सविस्तर आढावा घेण्यात आला.

या बैठकीस जिल्हा परिषदेचे उपाध्यक्ष तथा अर्थ व बांधकाम समितीचे सभापती इंद्रजीत पवार, कृषी, पशुसंवर्धन व दुग्धशाळा समितीचे सभापती रामप्पा चिवडशेट्टी, जल व्यवस्थापन समितीचे सदस्य सिद्धाराम शिवमूर्ती, गीतांजली साळुंखे, शनमुखी कोरके, रश्मी हिप्परगी, वंदना कांबळे आदी उपस्थित होते.
तसेच समितीचे सचिव तथा अतिरिक्त मुख्य कार्यकारी अधिकारी संदीप कोहिनकर, लघुपाटबंधारे विभागाचे कार्यकारी अभियंता जयेश हेडगिरे, ग्रामीण पाणीपुरवठा विभागाचे कार्यकारी अभियंता, महाराष्ट्र जीवन प्राधिकरणाचे कार्यकारी अभियंता आणि वरिष्ठ भूवैज्ञानिक शेख यांची उपस्थिती होती.
गावनिहाय नाल्यांची माहिती संकलित करणार
जिल्ह्यातील जलसंधारणाच्या कामांना अधिक प्रभावी दिशा देण्यासाठी प्रत्येक गावातील नाल्यांची सविस्तर माहिती संकलित करण्याचे निर्देश देण्यात आले. जलसंधारण विभागातील संबंधित उपअभियंत्यांनी ही माहिती तयार करून संबंधित तालुक्यातील लोकप्रतिनिधींच्या निदर्शनास आणावी, असे अध्यक्षांनी सांगितले. यासाठी महाराष्ट्र रिमोट सेन्सिंग अॅप्लिकेशन सेंटर (MRSAC) यांनी विकसित केलेल्या ‘स्मार्ट व्हिलेज पोर्टल’चा वापर करण्याच्या सूचना अतिरिक्त मुख्य कार्यकारी अधिकारी संदीप कोहिनकर यांनी दिल्या. या पोर्टलमुळे गावातील जलस्रोतांची माहिती उपलब्ध होऊन जलसंधारणाच्या कामांचे नियोजन अधिक प्रभावीपणे करता येणार आहे.
शेतकऱ्यांच्या सिंचनासाठी वीजपुरवठा सुरळीत ठेवा
पाणीटंचाईच्या काळात शेतीसाठी सिंचनाची उपलब्धता कायम राहणे आवश्यक आहे. महावितरण विभागाकडील विद्युत रोहित्र (डीपी) नादुरुस्त झाल्यास त्याची तातडीने दुरुस्ती करून वीजपुरवठा पूर्ववत करावा. शेतकऱ्यांना विद्युत पंपाद्वारे सिंचन करताना अडचणी येऊ नयेत, याची दक्षता घ्यावी, अशा सूचनाही दीपक वैद्य यांनी दिल्या.
पाणीटंचाईवर मात करण्यासाठी नियोजनबद्ध उपाययोजना, जलसंधारणाच्या कामांची प्रभावी अंमलबजावणी आणि पाणीपुरवठा योजनांची प्रत्यक्ष कार्यक्षमता यावर भर देण्यात आला. नागरिकांना नियमित पाणीपुरवठा आणि शेतकऱ्यांना सिंचनासाठी आवश्यक सुविधा उपलब्ध करून देण्यासाठी सर्व संबंधित विभागांनी समन्वयाने व तत्परतेने काम करावे, असे निर्देश या बैठकीत देण्यात आले.
जनता संघर्ष न्यूज,सोलापूर
संपादक – सिद्धार्थ भडकुंबे
बातम्या व जाहिरातीसाठी संपर्क – 9579838240















