- प्रतिनिधी -सोलापूर
सोलापूर, दि. २७ जुलै : सोलापूर जिल्हा परिषद आरोग्य विभागाने आरोग्य सेवांच्या गुणवत्तेच्या क्षेत्रात ऐतिहासिक यश संपादन करत जिल्ह्याच्या इतिहासात प्रथमच तीन आयुष्मान आरोग्य मंदिरांना राष्ट्रीय गुणवत्ता आश्वासन मानांकन (National Quality Assurance Standards – NQAS) प्राप्त करून दिले आहे. राष्ट्रीय गुणवत्ता मानांकनाची प्रक्रिया सुरू झाल्यापासून प्रथमच जिल्हा परिषदेच्या तीन आरोग्य संस्थांनी ही उल्लेखनीय कामगिरी केली असून, हे यश मुख्य कार्यकारी अधिकारी कुशल जैन यांच्या प्रभावी नियोजन, सक्षम नेतृत्व आणि आरोग्य विभागाच्या समन्वित प्रयत्नांचे फलित मानले जात आहे.
केंद्र शासनाच्या राष्ट्रीय आरोग्य अभियान (NHM) अंतर्गत आरोग्य संस्थांमधील सेवा, सुविधा, स्वच्छता, रुग्ण सुरक्षा, व्यवस्थापन, रुग्णकेंद्रित सेवा, प्रभावी आरोग्य सेवा वितरण तसेच जनजागृती यांचे सखोल मूल्यांकन करून राष्ट्रीय गुणवत्ता आश्वासन मानांकन (NQAS) प्रदान करण्यात येते. आरोग्य सेवेतील गुणवत्तेचे हे राष्ट्रीय स्तरावरील सर्वोच्च मानांकन मानले जाते.
आज जाहीर झालेल्या NQAS मूल्यांकनाच्या निकालात सोलापूर जिल्ह्यातील तीन आयुष्मान आरोग्य मंदिरांनी उत्कृष्ट गुणवत्ता सिद्ध करत राष्ट्रीय मानांकन प्राप्त केले. विशेष म्हणजे जिल्हा परिषद आरोग्य विभाग, जिल्हा शल्यचिकित्सक कार्यालय आणि महानगरपालिका आरोग्य विभागातील विविध संस्थांपैकी केवळ जिल्हा परिषद आरोग्य विभागालाच हे मानांकन मिळाले असून, ही बाब संपूर्ण जिल्ह्यासाठी अभिमानाची ठरली आहे.
राष्ट्रीय गुणवत्ता मानांकन प्राप्त आयुष्मान आरोग्य मंदिरे :
आयुष्मान आरोग्य मंदिर, मुस्ती (प्राथमिक आरोग्य केंद्र, बोरामणी, दक्षिण सोलापूर) – ८४.३१ टक्के
आयुष्मान आरोग्य मंदिर, येवती (प्राथमिक आरोग्य केंद्र, पाटकुल, मोहोळ) – ८३.७३ टक्के
आयुष्मान आरोग्य मंदिर, औंधी (प्राथमिक आरोग्य केंद्र, अंकोली, मोहोळ) – ८२.०० टक्के
या मानांकनामुळे ग्रामीण भागातील नागरिकांना त्यांच्या गावातच अधिक सुरक्षित, दर्जेदार, रुग्णकेंद्रित आणि विश्वासार्ह आरोग्य सेवा उपलब्ध होणार आहेत. तसेच सेवा वितरण, रुग्ण सुरक्षा, औषध व उपकरण व्यवस्थापन, नोंदवही व्यवस्थापन आणि रुग्ण समाधानात सातत्याने सुधारणा होणार आहे. याशिवाय, राष्ट्रीय आरोग्य अभियानांतर्गत मानांकन प्राप्त संस्थांना विशेष गुणवत्ता प्रोत्साहन निधी (Incentive Fund) मिळण्याची पात्रता प्राप्त होत असून, या निधीतून पायाभूत सुविधा, आधुनिक वैद्यकीय उपकरणे आणि रुग्ण सुविधांचा अधिक विकास केला जाणार आहे.हे ऐतिहासिक यश राज्याचे ग्रामविकास व पंचायत राज मंत्री तथा सोलापूर जिल्ह्याचे पालकमंत्री जयकुमार गोरे यांच्या मार्गदर्शनाखाली तसेच मुख्य कार्यकारी अधिकारी कुशल जैन, आरोग्य व शिक्षण समितीचे सभापती चेतनसिंह केदार यांच्या नेतृत्वाखाली जिल्हा आरोग्य अधिकारी डॉ. सतीश कोपुरवाड, अतिरिक्त जिल्हा आरोग्य अधिकारी डॉ. नंदकिशोर घाडगे, सहायक संचालक (कुष्ठरोग) डॉ. मोहन शेगर, जिल्हा माता-बाल संगोपन अधिकारी डॉ. हर्षल जाधव तसेच संपूर्ण आरोग्य विभागाच्या समन्वित प्रयत्नांमुळे शक्य झाले आहे.
यामध्ये तालुका आरोग्य अधिकारी, वैद्यकीय अधिकारी, समुदाय आरोग्य अधिकारी (CHO), आरोग्य कर्मचारी, आशा स्वयंसेविका आणि सर्व संबंधित अधिकारी-कर्मचाऱ्यांनी केलेल्या सामूहिक परिश्रमांचा मोलाचा वाटा असून, त्यांच्या समर्पित कार्यामुळे सोलापूर जिल्ह्याच्या आरोग्य सेवेच्या गुणवत्तेला राष्ट्रीय स्तरावर नवी ओळख मिळाली आहे.
