सोलापूर (प्रतिनिधी)
सोलापूर महानगरपालिका प्रभाग क्रमांक १५च्या नगरसेविका श्रीदेवीताई फुलारे यांना प्रभागातील नागरिकांकडून महापौर निवास ते रामलाल चौक या दरम्यान एक वयोवृद्ध महिला रस्त्याच्या कडेला पावसात भिजत असल्याची माहिती मिळाली. माहिती मिळताच त्यांनी तातडीने सामाजिक जबाबदारी पार पाडत मदतीसाठी पुढाकार घेतला.
यावेळी जॉन फुलारे यांनी त्वरित बेघर निवारा केंद्राशी संपर्क साधला. त्यानंतर बेघर निवारा केंद्राचे व्यवस्थापक अशोक वाघमारे यांनी तत्काळ घटनास्थळी पोहोचून संबंधित वयोवृद्ध महिलेला सुरक्षितपणे आपुलकी बेघर निवारा केंद्रात दाखल केले.
या संवेदनशील आणि तत्पर कार्यामुळे वयोवृद्ध महिलेला पावसापासून संरक्षण मिळाले असून नागरिकांनी नगरसेविका श्रीदेवीताई फुलारे, जॉन फुलारे तसेच बेघर निवारा केंद्राचे व्यवस्थापक अशोक वाघमारे यांच्या मानवतावादी कार्याचे कौतुक केले. सामाजिक बांधिलकी जपत गरजू व्यक्तींना वेळेवर मदत करणे हीच खरी लोकसेवा असल्याची भावना यावेळी नागरिकांनी व्यक्त केली.
