प्रतिनिधी -सोलापूर
सोलापूर महानगरपालिका आरोग्य विभाग व राष्ट्रीय शहरी आरोग्य अभियान (NUHM) अंतर्गत १५ व्या वित्त आयोगाच्या माध्यमातून आयुष्मान आरोग्य मंदिर – कोणापुरे चाळ नागरी आरोग्य वर्धिनी केंद्र (UHWC) येथे मंगळवारी (दि. ४ ऑगस्ट २०२६) शासकीय जनआरोग्य समितीची बैठक उत्साहात पार पडली.
प्रभाग क्रमांक १५-अच्या नगरसेविका तथा जनआरोग्य समितीच्या अध्यक्षा मा. सौ. श्रीदेवीताई जॉन अण्णा फुलारे यांच्या अध्यक्षतेखाली ही बैठक झाली. सह-अध्यक्षा तथा कुटुंब कल्याण व शहर संकलन वैद्यकीय अधिकारी डॉ. मंजिरी कुलकर्णी आणि सदस्य सचिव तथा आरोग्य केंद्र प्रमुख वैद्यकीय अधिकारी डॉ. पल्लोलू वाय. एच. यांच्या प्रमुख उपस्थितीत कार्यक्रमाची सुरुवात करण्यात आली. यावेळी भगवान श्री हनुमान यांच्या प्रतिमेस पुष्पहार अर्पण करून दीपप्रज्वलन करण्यात आले.
बैठकीच्या प्रारंभी डॉ. पल्लोलू यांनी उपस्थित मान्यवरांचे स्वागत करून बैठकीच्या विषयांची माहिती दिली. यावेळी आरोग्य केंद्रासाठी आवश्यक वैद्यकीय उपकरणे, अत्यावश्यक साहित्य, स्वच्छतेसाठी लागणाऱ्या वस्तूंची खरेदी तसेच कार्यक्षेत्रातील गरीब, गरजू, निराधार व दिव्यांग नागरिकांच्या आपत्कालीन गरजांसाठी उपलब्ध निधीचा योग्य वापर करण्याबाबत सविस्तर चर्चा करण्यात आली. संबंधित विषयांना समितीने मंजुरी व मान्यता दिली.
या बैठकीस समितीचे सदस्य बसवराज म्हेत्रे, दीपक म्हेत्रे, रमेश बेरे, विजय संदेवाल, मोईन शेख, मनोज चवरकर, दीपक माने, रोहित गायकवाड, सौ. संतोषी साबळे, सौ. रोहिणी निर्मळे, सौ. शफगुप्तानाज सिद्धिकी, सौ. संगीता सावंत, सौ. श्रुतिका काळे, सौ. आशा फुलेवार, चंद्रकला सोनावणे, रुकसाना इनामदार आदी सदस्य उपस्थित होते.
जनता संघर्ष न्यूज सोलापूर बातम्या व जाहिरातीसाठी संपर्क–9579838240
