प्रतिनिधी – सोलापूर,
पुण्यश्लोक अहिल्यादेवी होळकर सोलापूर विद्यापीठाचे कुलगुरू प्रा. प्रकाश महानवर यांना राष्ट्रीय छात्रसेना (एनसीसी) संचालनालय, महाराष्ट्र यांच्यातर्फे प्रतिष्ठेचा ‘मानद कर्नल’ हा सन्माननीय दर्जा प्रदान करण्यात येणार आहे. विद्यापीठाच्या शैक्षणिक, सामाजिक आणि विद्यार्थीहिताच्या कार्याची दखल घेत हा गौरव प्रदान केला जाणार असल्याने विद्यापीठाच्या शैक्षणिक वर्तुळात या सोहळ्याबाबत उत्सुकता निर्माण झाली आहे.या मानद कर्नल पदवी प्रदान सोहळ्याचे आयोजन सोमवार, १० ऑगस्ट रोजी सकाळी १०.३० वाजता पुण्यश्लोक अहिल्यादेवी होळकर सोलापूर विद्यापीठाच्या नवीन प्रशासकीय इमारतीतील ‘अहिल्या भवन’ येथील अधिसभा सभागृहात करण्यात आले आहे.
या समारंभास विद्यापीठातील अधिकारी, प्राध्यापक, कर्मचारी तसेच एनसीसीचे वरिष्ठ अधिकारी उपस्थित राहणार आहेत. एनसीसीच्या माध्यमातून विद्यार्थ्यांमध्ये शिस्त, नेतृत्वगुण, सामाजिक बांधिलकी आणि राष्ट्रसेवेची भावना रुजविण्यासाठी विद्यापीठाकडून करण्यात येणाऱ्या विविध उपक्रमांनाही या निमित्ताने विशेष महत्त्व प्राप्त होणार आहे.कुलगुरू प्रा. प्रकाश महानवर यांच्या नेतृत्वाखाली विद्यापीठाच्या शैक्षणिक विकासाबरोबरच सामाजिक उपक्रम, विद्यार्थीविकास आणि विविध क्षेत्रांतील उपक्रमांना चालना देण्यात येत आहे. या कार्याची दखल घेत त्यांना मानद कर्नल दर्जा प्रदान केला जाणार असल्याने हा सन्मान विद्यापीठासाठीही गौरवाची बाब मानली जात आहे.या सोहळ्यात एनसीसी संचालनालय, महाराष्ट्रातील वरिष्ठ अधिकारी मानद कर्नल दर्जा प्रदान करतील. विद्यापीठातील अधिकारी, शिक्षक, शिक्षकेतर कर्मचारी आणि एनसीसीशी संबंधित मान्यवरांच्या उपस्थितीत हा समारंभ उत्साहात पार पडणार आहे. या सन्मानामुळे विद्यापीठ आणि एनसीसी यांच्यातील सहकार्याला आणखी बळ मिळण्याची अपेक्षा व्यक्त होत आहे.
बातम्या व जाहिरातीसाठी संपर्क -9579838240
