प्रतिनिधी- अक्कलकोट
स्वातंत्र्य दिनानिमित्त गोगांव ग्रामपंचायत तसेच जिल्हा परिषद प्राथमिक शाळेत विविध कार्यक्रम उत्साहात पार पडले. देशभक्तीपूर्ण वातावरणात ध्वजारोहण, राष्ट्रपुरुषांच्या प्रतिमांचे पूजन आणि अभिवादन करण्यात आले. यावेळी गोगांवचे माजी सरपंच तथा भाजपा तालुका उपाध्यक्ष कै. प्रदीप जगताप यांच्या सामाजिक व राजकीय कार्याची आठवण करून त्यांना भावपूर्ण अभिवादन करण्यात आले.
गोगांव ग्रामपंचायत कार्यालयात उपसरपंच कमलाकर सोनकांबळे यांच्या हस्ते ध्वजारोहण करण्यात आले. कार्यक्रमाच्या अध्यक्षस्थानी सूर्यकांत जिरगे होते. सरपंच सौ. वनिता मधुकर सुरवसे, ग्रामपंचायत सदस्य लक्ष्मण बिराजदार, ग्रामपंचायत अधिकारी विक्रम घाटे यांच्यासह ग्रामस्थ व मान्यवर उपस्थित होते.
कार्यक्रमाच्या प्रारंभी डॉ. बाबासाहेब आंबेडकर व महात्मा गांधी यांच्या प्रतिमांचे पूजन डॉ. लिंगराज नडगेरी व अनिल मुलगे यांच्या हस्ते करण्यात आले. ध्वजकट्टा पूजन शरणपा कलशेट्टी यांनी केले. यावेळी स्वातंत्र्यसैनिकांचे योगदान, स्वातंत्र्याचे महत्त्व तसेच संविधानिक मूल्यांचे जतन करण्याची गरज यावर उपस्थितांनी विचार व्यक्त केले.
यानंतर जिल्हा परिषद प्राथमिक शाळा, गोगांव येथेही स्वातंत्र्य दिनाचा कार्यक्रम उत्साहात पार पडला. कार्यक्रमाच्या अध्यक्षस्थानी सरपंच सौ. वनिता सुरवसे होत्या. प्रतिमापूजन पोलीस पाटील चंद्रकला गायकवाड व शालेय व्यवस्थापन समितीचे अध्यक्ष शरणपा मुळजे यांच्या हस्ते करण्यात आले. ध्वजकट्टा पूजन सुधाकर सुरवसे यांनी केले, तर ग्रामपंचायत सदस्य लक्ष्मण बिराजदार यांच्या हस्ते ध्वजारोहण करण्यात आले.
यावेळी उपसरपंच कमलाकर सोनकांबळे, मुख्याध्यापक पुंडलिक वाघमारे, आशा भोसले यांच्यासह शिक्षक, ग्रामपंचायत पदाधिकारी, शालेय व्यवस्थापन समितीचे पदाधिकारी, विद्यार्थी व ग्रामस्थ उपस्थित होते. कार्यक्रमाचे सूत्रसंचालन व आभार शंकर कारभारी सर यांनी मानले.
