नवी दिल्ली/मुंबई
पंतप्रधान नरेंद्र मोदी यांच्या नेतृत्वाखालील केंद्र सरकारने शिवसेना खासदार डॉ. ज्योती वाघमारे यांची महिला व बालविकास मंत्रालयाच्या महत्त्वपूर्ण सल्लागार समितीवर (Consultative Committee) सदस्य म्हणून नियुक्ती केली आहे. संसदीय कार्य मंत्रालयाने १७ ऑगस्ट २०२६ रोजी जारी केलेल्या अधिसूचनेद्वारे या नियुक्तीची अधिकृत घोषणा करण्यात आली.
राज्यसभेचे सदस्यत्व मिळाल्यानंतर पहिल्याच संसदीय अधिवेशनानंतर डॉ. वाघमारे यांच्यावर ही महत्त्वाची जबाबदारी सोपविण्यात आली आहे. त्यामुळे त्यांच्या संसदीय आणि राजकीय प्रवासातील हा महत्त्वपूर्ण टप्पा मानला जात आहे.
उपमुख्यमंत्री एकनाथ शिंदे यांच्या हस्ते नियुक्तीपत्राचा स्वीकार
या नियुक्तीचे अधिकृत पत्र शिवसेनेचे मुख्य नेते आणि महाराष्ट्राचे उपमुख्यमंत्री एकनाथ शिंदे यांच्या हस्ते डॉ. ज्योती वाघमारे यांनी स्वीकारले. यावेळी उपमुख्यमंत्री शिंदे यांनी त्यांचे अभिनंदन करत महिला व बालकांच्या सक्षमीकरणासाठी त्या राष्ट्रीय पातळीवर प्रभावीपणे काम करतील, असा विश्वास व्यक्त केला.
पहिल्याच अधिवेशनानंतर मोठी जबाबदारी
राज्यसभेच्या पहिल्याच अधिवेशनात डॉ. वाघमारे यांनी विविध विषयांवरील अभ्यासपूर्ण मांडणी आणि सक्रिय सहभागातून आपली छाप पाडली होती. त्यांच्या या कामाची दखल घेत केंद्र सरकारने त्यांची महिला व बालविकास मंत्रालयाच्या सल्लागार समितीवर नियुक्ती केली आहे.
महिलांचे आरोग्य, सुरक्षा, सक्षमीकरण तसेच बालकांचा विकास आणि कल्याण यांसारख्या महत्त्वाच्या विषयांवर धोरणात्मक चर्चा व सल्ला देण्यात या समितीची भूमिका महत्त्वाची असते. त्यामुळे डॉ. वाघमारे यांना राष्ट्रीय पातळीवर या विषयांवर योगदान देण्याची संधी मिळणार आहे.
या नियुक्तीबद्दल डॉ. ज्योती वाघमारे यांचे राजकीय, सामाजिक आणि विविध क्षेत्रांतून अभिनंदन करण्यात येत असून, त्यांच्या पुढील कार्यासाठी शुभेच्छा दिल्या जात आहेत.
